ԵՐԵՎԱՆ, 3 հունիսի - Sputnik. Նոր Նորք վարչական շրջանի ղեկավար Տիգրան Տեր-Մարգարյանը Երևանի քաղաքապետ Տիգրան Ավինյանի անունից Երևան այցելության պաշտոնական հրավեր է փոխանցել Կիևի քաղաքապետ Վիտալի Կլիչկոյին։ Այս մասին տեղեկաում ենք վարչական շրջանի ֆեյսբուքյան էջից։
Նշվում է, որ Տիգրան Տեր-Մարգարյանը Ուկրաինա է մեկնել աշխատանքային այցով, նա և Ուկրաինայում Հայաստանի դեսպան Վլադիմիր Կարապետյանը հանդիպում են ունեցել Բուչայի քաղաքապետի հետ, քննարկել Բուչայի և Երևանի Նոր Նորք վարչական շրջանի միջև համագործակցության հաստատման հնարավորությունները։
«Մենք հպարտ ենք ուկրաինացի ժողովրդի խիզախությամբ և մշտապես պատրաստ ենք աջակցելու Բուչային և պատերազմական գործողությունների արդյունքում տուժած մյուս համայնքներին»,- ընդգծել է Տիգրան Տեր-Մարգարյանը։
Նշվում է, որ հայկական պատվիրակությունը դեղորայքի տեսքով մարդասիրական օգնություն է փոխանցել ուկրաինական կողմի առողջապահական հաստատություններին։
Աշխատանքային այցի ընթացքում Նոր Նորքի վարչական ղեկավարն ու դեսպան Կարապետյանը հանդիպել են նաև Օդեսայի հայկական համայնքի ներկայացուցիչներին։