ԵՐԵՎԱՆ, 31 մայիսի – Sputnik. «Տավուշը հանուն հայրենիքի» շարժումը վաղը Գյումրիում մեծ հանրահավաք է նախատեսում։ Այս մասին Սուրբ Աննա եկեղեցու բակում հայտարարեց Բագրատ սրբազանը։
«Ժամը 18։00 Գյումրու Վարդան Աճեմյանի անվան թատրոնի բակում տեղի կունենա մեծ հանրահավաք»,– հայտարարեց «Տավուշը հանուն հայրենիքի» շարժման առաջնորդը։
Նա հավելեց, որ վաղը ժամը 11։30-ին Աշտարակի Կամիր խաչի մոտից մեքենաների շարասյունը կմեկնի Գյումրի։
«Շատ կարևոր է, որ մարզերում ևս մասնակցեն շարժմանը։ Մեր ծրագիրը, օրակարգը քայլ առ քայլ գնում է առաջ՝ հասնելու նպատակին»,- ասաց նա։
Հիշեցնենք` ՀՀ–ում բողոքի ակցիաներ սկսվեցին, երբ ապրիլի 19-ին հայտնի դարձավ, որ Երևանն ու Բաքուն պայմանավորվել են սահմանազատումը սկսել Տավուշի հատվածից։ Հայ–ադրբեջանական սահմանազատումից դժգոհ քաղաքացիները տևական ժամանակ ակցիաներ էին անում Տավուշի մարզում։ «Տավուշը հանուն հայրենիքի» շարժման անդամներն ու նրանց կողմնակիցները մայիսի 4-ին որոշեցին Կիրանց գյուղից երթով գալ Երևան։ Մայիսի 9-ին նրանք հասան մայրաքաղաք։
Այդ օրը Հանրապետության հրապարակում հանրահավաք տեղի ունեցավ, և շարժման առաջնորդ Բագրատ սրբազանը ՀՀ վարչապետ Նիկոլ Փաշինյանին մեկ ժամ ժամանակ տվեց հրաժարականի համար, ինչը տեղի չունեցավ։ Դրանից հետո նա կոչ արեց մայիսի 10-ից անհնազանդության խաղաղ ակցիաներ սկսել ամբողջ հանրապետությունում։ Շարժման մասնակիցներն ու կողմնակիցները հաջորդ օրվանից սկսեցին փողոցներ ու ճանապարհներ փակել, իրազեկման ակցիաներ իրականացնել` քաղաքացիներին հորդորելով միանալ իրենց։
Մայիսի 26–ին Հանրապետության հրապարակում տեղի ունեցած հանրահավաքի ժամանակ հայտարարվեց, որ «Տավուշը հանուն հայրենիքի» անցումային կառավարության վարչապետի թեկնածուն Բագրատ սրբազանն է։