Աղետներին պետք է պատրաստվել մինչև աղետը. ոսկե կանոնը երբեք չի գործում։ Խոսքը միայն մեր երկրի մասին չէ։ Բնական աղետների դեպքում ձեռքերը վեր են բաձրացնում նույնիսկ զարգացած երկրները։ Ընդունում են օգնության առաջարկները, միավորում են փրկարարական ուժերն ու տեխնիկան աղետի հետևանքները վերացնելու համար։ Հայաստանը բացառություն չէ։ Ռուսաստանը, Հունաստանն ու հարևան Իրանն առաջարկեցին իրենց օգնությունը։ Ընդունե՞լ է Հայաստանը, թե՞ ոչ` դեռ կիմանանք։
Յուրաքանչյուր աղետից հետո անհրաժեշտ է դասեր քաղել։ Մայիսյան աղետը ջրի երես հանեց մի քանի կարևոր խնդիրներ։ Ինչպես ցանկացած աղետի դեպքում, ջրհեղեղի ժամանակ էլ խիստ կարևոր է իմանալ` ինչպե՞ս վարվել, ի՞նչ անել, որտե՞ղ պատսպարվել։ Ներքին գործերի նախարարությունը աղետից մեկ օր հետո սկսեց բջջային հաղորդագրություններ ուղարկել ջրհեղեղի դեպքում կիրառվող վարքակաոնների մասին։ Բայց դա նույնիսկ ճաշից հետո մանանեխ էլ չէր, որովեհտև աղետի գոտում կապ չկար ու sms-ները ստացել են հեղեղված վայրերից հեռու գտնվող բաժանորդները։
Կա աղետների ռիսկերի գնահատում և կառավարում հասկացությունը, ըստ որի էլ պետք է գործեր արտակարգ իրավիճակների համար պատասխանատու գերատեսչությունը։ Ժամանակին նախարարություն էր, հիմա` փրկարար ծառայություն Ներքին գործերի նախարարության կազմում, որի ղեկավարը կադրային ոստիկան է։ Նիկոլ Փաշինյանը փրկարար ծառայության գեներալ-մայորի կոչումն իր հայրենակից Կամո Ցուցուլյանին շնորհեց մայիսի 27-ին, ջրհեղեղի հաջորդ օրը։
Փրկարարներն, այո` հերոսներ են, նրանք կյանքեր են փրկում ու բոլորովին կարևոր չէ, թե որ նախարարության կազմում։ Բայց խնդիրը ոլորտի համակարգումն է, քաղաքականությունը։ Այն էլ մի երկրում, որին բնական աղետներից չի սպառնում թերևս միայն ցունամին։
Ազդեցություն ունեցա՞վ արդյոք ԱԻՆ-ի լուծարումը ջրհեղեղի հետևանքների վերացման գործում, ի՞նչ չարեց փրկարար ծառայությունը, որը կաներ նախարարությունը, եթե չլուծարվեր։ Sputnik Արմենիան զրուցել է փրկարար ծառայության գեներալ-մայոր, ԱԻՆ փրկարար ծառայության տնօրենի նախկին տեղակալ Նիկոլայ Գրիգորյանի հետ։