ԵՐԵՎԱՆ, 29 մայիսի – Sputnik․ Պետությունը աղետի գոտու տնտեսվարողներին և բնակիչներին որոշակի աջակցություն կցուցաբերի ստեղծված ծանր իրավիճակից դուրս գալու համար։ Այսօր Ալավերդու համայնքապետարանում լրագրողների հետ հանդիպմանը այս հայտարարությունն արեց ՀՀ տարածքային կառավարման և ենթակառուցվածքների նախարար Գնել Սանոսյանը։
«Կզիջվեն որոշակի հարկային պարտավորություններ, որոշակի ֆինանսական աջակցություն կցուցաբերվի, փոխհատուցումներ, արտոնյալ ծրագրեր կլինեն, օրինակ՝ գյուղատնտեսական, հեկտարներով այգիներ են վնասվել»,- նշեց Սանոսյանը։
Նրա խոսքով՝ արդեն իսկ տարբերակներ քննարկվում են, սակայն այս պահին դեռ հստակ որոշումներ չկան։ Նախարարը նշեց՝ վնասները դեռևս գույքագրվում են։
Հիշեցնենք` մայիսի 26–ի տեղատարափ անձրևներից հետո Լոռու և Տավուշի մարզերում Դեբեդ, Աղստև և Տաշիր գետերի վարարմանհետևանքով 4 մարդ է մահացել։
Որոշում է կայացվել Լոռու և Տավուշի մարզերի տուժած բնակավայրերը հայտարարել աղետի գոտի և մարզպետարաններին 300 մլն դրամ հատկացնել հեղեղումների հետևանքները վերացնելու համար։