«Ամենայն հայոց կաթողիկոսի այցը Սարդարապատի հուշահամալիր սովորաբար առավոտյան ժամերի է լինում, բայց քանի որ կար հաստատված ժամ, որ պետական այրերը պետք է գնային այդ ժամին, ժամային փոփոխություն էր եղել»,-Alpha News-ի եթերում մանրամասնել է Մայր աթոռ Սուրբ Էջմիածնի միաբան Ռուբեն վարդապետ Զարգարյանը։
Ըստ վարդապետի՝ հոգևորականները նախ Սուրբ Գայանե վանքում Ամենայն հայոց հայրապետի հանդիսապետությամբ մասնակցել են սուրբ պատարագին, իսկ վերջում հանրապետական կարգ է արվել՝ նվիրված Հանրապետության տոնին։ Դրանից որոշ ժամանակ Վեհափառի ուղեկցությամբ ուղևորվել են Սարդարապատ։
Հոգևորականը պատմել է, որ Սարդարապատի հուշահամալիր հասնելով՝ նախ իրենց մեքենաները հանդիպել են արգելանքի, բայց երբ որոշել են կաթողիկոսի հետ ոտքով առաջ գնալ, հանդիպել են ոստիկանական առաջին շարքին, ինչը հաղթահարելուց հետո ոստիկանները 2-րդ շարք են կազմել։
«Բայց, կարծես, նրանք էլ չէին հասկանում՝ ինչ են անում կամ ինչի համար»,-ասել է Ռուբեն վարդապետ Զարգարյանը։