ԵՐԵՎԱՆ, 28 մայիսի – Sputnik. Մայիսյան հերոսամարտերի պատմական իրադարձություններն անկյունաքարային նշանակություն են ունեցել հայոց պետականության վերականգնման գործում։ Ասված է Հանրապետության տոնի առիթով Ն. Ս. Օ. Տ. Տ. Գարեգին Բ Ամենայն հայոց կաթողիկոսի ուղերձում։ Տեղեկությունը հայտնում է Մայր աթոռի տեղեկատվական համակարգը։
«Մայիսյան հերոսամարտերի պատմական իրադարձությունները անկյունաքարային նշանակություն ունեցան հայոց պետականության վերականգնման՝ Հայաստանի առաջին հանրապետության ստեղծման և մեր ազգային կյանքի վերազարթոնքի գործում։ Այս օրերին, երբ անվտանգային լրջագույն սպառնալիքների և գոյաբանական հիմնախնդիրների առջև ենք, հրամայական է, որ միասնական, աննկուն ու հաստատակամ լինենք՝ ընդդեմ մեր ազգային կյանքը փոթորկող ներքին և արտաքին մարտահրավերների»,– ասված է ուղերձում։
Կաթողիկոսը նաև կոչ է արել վանել կործանարար անտարբերությունը, փարատել թշնամության ու ատելության մթնոլորտը, որպեսզի միասնականության հուսառատ ու զորեղ ոգով հաստատվի ապահովություն և խաղաղություն։
Հիշեցնենք` Հայաստանի Առաջին Հանրապետությունը հռչակվել է 1918 թվականի մայիսի 28-ին ու գոյություն է ունեցել մինչև 1920 թվականը։