ԵՐԵՎԱՆ, 27 մայիսի – Sputnik․ Փաստաբան Արամ Վարդևանյանը հաղորդում է ներկայացրել ՀՀ գլխավոր դատախազություն ՀՀ ԱԺ պատգամավոր Աշոտ Սիմոնյանի նկատմամբ բռնություն կիրառած ոստիկանների վերաբերյալ։ Այս մասին նա գրել է իր ֆեյսբուքյան էջում։
Ավելի վաղ տեսանյութ էր հրապարկվել, որտեղ երևում էր, թե ինչպես են մոտ երկու տասնյակ ոստիկաններ շրջապատել ՀՀ ԱԺ «Հայաստան» խմբակցության պատգամավոր Աշոտ Սիմոնյանին։ Նրանցից 1–2–ը հարվածում էին պատգամավորին ու քաշքշում։
«Օրենքի առջև հավասարություն սկզբունքի մնացորդ տարրերը կա՛մ կպահպանվի, կա՛մ կարձանագրվի, որ այն այլևս գոյություն չունի: Կոնկրետ ոստիկանների նկատմամբ պետք է հարուցվի հանրային քրեական հետապնդում ի թիվս այլի` խուլիգանության հատկանիշներով։ Հարուցելու լիազորությունը դատախազության տիրույթում է»,– գրել է նա։
Փաստաբանը նաև իր հաղորդման մեջ ներկայացրել է բռնություն գործադրած ոստիկանների անունները, որպեսզի ինչպես ինքն է նշում` դատախազությունն ինքնության պարզման ուղղությամբ ժամանակ չկորցնի։
Հիշեցնենք` ՀՀ ՆԳՆ ոստիկանությունից հայտնել էին, որ ԱԺ «Հայաստան» խմբակցության պատգամավոր Աշոտ Սիմոնյանին բիրտ ուժ կիրառելով բերման ենթարկելու դեպքով նշանակվել է ծառայողական քննություն։