Կեցցե Հայաստանը, կեցցե Իրանը․ դեսպանությունը երախտագիտություն է հայտնել կարեկցանքի համար

ԵՐԵՎԱՆ, 27 մայիսի – Sputnik․ Հայաստանում Իրանի դեսպանությունը մեր երկրին երախտագիտություն է հայտնել դժվարին պահին ցուցաբերած կարեկցանքի ու զորակցության համար։

«Մեր անկեղծ շնորհակալության ու երախտագիտության խոսքն ենք հայտնում հարևան և բարեկամ Հայաստանի ազնվաբարո ժողովրդին ու կառավարությանը` ուղղաթիռի կործանման հետևանքով մահացած նախագահի, արտաքին գործերի նախարարի և ուղեկցող անձանց նահատակության կապակցությամբ Իրանի կառավարությանն ու ժողովրդին իրենց կարեկցանքը և զորակցությունը հայտնելու համար»,- նշված է դեսպանության ուղերձում։

Իրանի դիվանագիտական ներկայացուցչությունում հիշեցնում են, որ ՀՀ բարձրաստիճան պաշտոնյաներ, պետական և ոչ պետական նշանավոր գործիչներ այցելել և ցավակցական գրառումներ են կատարել դեսպանատանը բացված սգո մատյանում, ծաղիկներ խոնարհել, մոմեր վառել դեսպանատան առջև։ Սա ևս մեկ անգամ ցույց տվեց, որ երկու ժողովուրդների բարեկամությունը պատմական ու հինավուրց խոր արմատներ ունի և երկու ժողովուրդները կիսում են միմյանց վիշտը։

Հիշեցնենք` Իրանի նախագահ Էբրահիմ Ռայիսիին և արտգործնախարար Հոսեյն Ամիր Աբդոլլահիանին տեղափոխող ուղղաթիռը կործանվել է մայիսի 19-ին երկրի հյուսիս-արևմուտքում՝ Վերզեգանի շրջանում: Բարձրաստիճան պաշտոնյաները վերադառնում էին Արաքս գետի վրա հիդրոհանգույցների բացման արարողությունից, որին մասնակցում էր Ադրբեջանի նախագահ Իլհամ Ալիևը: Փրկարարների թիմերը մեկնել էին արտակարգ պատահարի վայր և որոնումներ իրականացրել ամբողջ գիշեր, նրանց աշխատանքը բարդացել էր մթության և տեղատարափի պատճառով:

Մայիսի 20-ի առավոտյան հայտնի դարձավ, որ հայտնաբերվել են ուղղաթիռի այրված բեկորները, իսկ ինքնաթիռում գտնվող բոլոր մարդիկ մահացել են։

Ուղղաթիռի կործանման հետևանքով մահացել են Իրանի նախագահ Էբրահիմ Ռայիսին, արտաքին գործերի նախարար Հոսեյն Ամիր Աբդոլլահիանը, Արևելյան Ադրբեջանի նահանգապետ Մալիք Ռահմաթին, Թավրիզում ուրբաթօրյա աղոթքի ղեկավար այաթոլլա Մոհամմադ Ալի ալ–է–Հաշեմը, ԻՀՊԿ ներկայացուցիչ Սեյեդ Մեհդի Մուսավին ու անձնակազմի 3 անդամները։