ԵՐԵՎԱՆ, 25 մայիսի – Sputnik․ ՀՀ պաշտպանության նախարարությունը հերքում է «Զինվորական սպաները հրաժարվում են կատարել Տավուշի դիրքերից հետ քաշվելու հրամանը» վերտառությամբ հրապարակում՝ նշելով, որ այն ամբողջովին կեղծ է, հորինված և չի համապատասխանում իրականությանը։ Այս մասին գերատեսչությունը պաշտոնական հաղորդագրություն է տարածել։
«Պաշտպանության նախարարությունը կոչ է անում զերծ մնալ զինված ուժերի, զինված ուժերի ղեկավար կազմի, զինծառայողների վերաբերյալ հորինված տարբեր պատմություններ հրապարակելուց, կեղծիք ու ապատեղեկատվություն տարածելուց և հիմք ընդունել բացառապես գերատեսչության պաշտոնական հաղորդագրություններն ու հայտարարությունները»,- նշված է հաղորդագրության մեջ։
Նշենք, որ «Ազգային ճակատ» տելեգրամյան ալիքը հայտնել էր, թե մի շարք զինվորականներ և բարձրաստիճան սպաներ հրաժարվել են հետ քաշվել Տավուշի հայկական դիրքերից և ականազերծում կատարել՝ չենթակվելով սահմանազատման ու սահմանագծման քողի տակ տրված ապազգային հրամանին։ Ավելին՝ նրանք հրաժարական են ներկայացրել։
Ալիքը նաև հայտնում էր, թե 3-րդ բանակային կորպուսի հրամանատար Ցականյանի մի շարք ենթակա սպաներ պահանջել են ներկայացնել ՀՀ Զինված ուժերի գլխավոր շտաբի պետ Էդվարդ Ասրյանի կողմից ստորագրված հրամանը, սակայն կորպուսի հրամանատարը մերժել է։