ԵՐԵՎԱՆ, 24 մայիսի – Sputnik. ԱՄՆ-ում և Արևմուտքի մի շարք առաջատար երկրներում բազմակողմանի և իրարամերժ հայտարարություններ և գնահատականներ են հնչում Ուկրաինայում տիրող իրավիճակի զարգացման վերաբերյալ։ Ինչպես հայտնում է Sputnik Ղրղզստանը, լրագրողներին այս մասին ասել է Ռուսաստանի արտաքին հետախուզության ծառայության ղեկավար Սերգեյ Նարիշկինը Բիշքեկում ԱՊՀ երկրների հատուկ ծառայությունների ղեկավարների նիստից հետո։
Նրա խոսքով՝ արևմտյան էլիտաները որոշակի շփոթության մեջ են. նրանք գիտակցել են, որ մարտադաշտում ռազմավարական նախաձեռնությունն ամբողջությամբ անցել է Ռուսաստանին:
«Սա տեղի է ունենում այն բանից հետո, երբ 1,5 տարի արևմտյան քաղաքական գործիչները մե՛կ անհատապես, մե՛կ խմբով փնթփնթում էին էին մարտի դաշտում Ռուսաստանի այսպես կոչված ռազմավարական պարտության մասին։ Միևնույն ժամանակ արևմտյան երկրները պատրաստ չեն փոխզիջումային լուծում գտնել հակամարտության կարգավորման հարցում և փորձում են խորհրդակցություն հրավիրել Շվեյցարիայում, որը ոչ մի ընդհանուր բան չունի Ուկրաինայի հակամարտության կարգավորման ուղիների որոնման հետ»,-ասել է ՌԴ ԱԳ նախարարը։
Նարիշկինի խոսքով` նրանք ինչ–որ գործողությունների իմիտացիա են ստեղծում և փորձում են ներկայացնել, թե մեծամասնությունը Ուկրաինայի կողմից է, թեև դա այդպես չէ։
«ԱՄՆ-ն փորձում է այդ անհեռանկար նախագծի մասնակից դարձնել գլոբալ Հարավի մեծ թվով երկրների»,-հայտարարել է Ռուսաստանի ԱՀԾ-ի ղեկավարը:
Նրա խոսքով՝ Ռուսաստանը միշտ բաց երկխոսության պատրաստակամություն է հայտնել և հայտնում, երկխոսություն, որը հաշվի կառնի և՛ ՌԴ–ի շահերը, և՛ Եվրոպայի հավասար և անբաժանելի անվտանգության հիմնարար սկզբունքները, և՛ իրական իրավիճակը:
Նշենք, որ մայիսի 24-ին Բիշքեկում տեղի է ունեցել ԱՊՀ երկրների անվտանգության մարմինների և հատուկ ծառայությունների ղեկավարների 54-րդ նիստը: Հանդիպմանը մասնակցել են Ղրղզստանի պետական անվտանգության ծառայության նախագահ Կամչիբեկ Տաշիևը, Ռուսաստանի ԱԴԾ ղեկավար Ալեքսանդր Բորտնիկովը, ՌԴ արտաքին հետախուզության ծառայության տնօրեն Սերգեյ Նարիշկինը և ԱՊՀ երկրների հատուկ ծառայությունների այլ ղեկավարներ: Հայաստանը ներկայացրել է ՀՀ ԱԱԾ պետի տեղակալ Սամվել Հայրապետյանը: