Հասարակական տրանսպորտի որոշ երթուղիների վարորդներ երեկ դուրս չէին եկել աշխատանքի, այդպիսով իրենց բողոքն արտահայտելով ղեկավարության դեմ։
Ըստ վարարոդների՝ «Երևանի ավտոբուս» ընկերության տնօրենի ժամանակավոր պաշտոնակատար Սամվել Նազարյանը հին աշխատողներին անհիմն հեռացնում է և իր մտերիմներին է տեղավորում աշխատանքի։
Երևանի քաղաքապետի մամուլի քարտուղար Հայկ Կոստանյանը ֆեյսբուքում գրել էր, որ վարորդների կողմից ըստ էության արձանագրվել են աշխատանքային պարտականությունները չկատարելու և ուղեգծերից անհիմն դուրս գալու դեպքեր: Ըստ Կոստանյանի՝ «Երևանի ավտոբուս» ընկերությունում ավելի խիստ հսկողության արդյունքում ուղևորափոխադրումների շաբաթական հասույթներն աճել են, ստվերը կրճատվել է։
Երևանի քաղաքապետարանը վարորդների այս նախաձեռնությունը ըստ էության դիտարկում է որպես սաբոտաժային քայլ՝ ընդդեմ տրանսպորտի ոլորտում իրականացվող իրական և բովանդակային բարեփոխումների: Ըստ քաղաքային իշխանությունների՝ կան ստույգ տվյալներ, որ վարորդների այդ գործողություններն ուղղորդված են։
Երեկ երեկոյան գործադուլ անող վարորդներին հանդիպել է Երևանի քաղաքապետ Տիգրան Ավինյանը։ Վարորդների այն պնդմանը, թե «Երևանի ավտոբուս» ընկերության տնօրենի ժամանակավոր պաշտոնակատար Սամվել Նազարյանը ապօրինություններ է թույլ տալիս, քաղաքապետն ասել է՝ «Եթե ճիշտ եղաք՝ ես Նազարյանին էլ կհեռացնեմ»