ԵՐԵՎԱՆ, 21 մայիսի – Sputnik. Սիրիայի նախագահ Բաշար Ասադի կնոջ՝ Ասմա Ասադի մոտ ախտորոշվել է սուր միելոիդ լեյկոզ: Տեղեկությունը հայտնել է Սիրիայի նախագահի աշխատակազմը:
«Մի քանի ախտանշանների և կլինիկական նշանների ի հայտ գալուց հետո, ինչպես նաև մի շարք բժշկական հետազոտություններ և հետազոտություններ անցկացնելուց հետո ախտորոշվել է սուր միելոիդ լեյկոզ»,- ասված է հայտարարության մեջ:
Նշվում է, որ առաջին տիկինը կպահպանի սոցիալական հեռավորության կանոնները և ժամանակավորապես չի մասնակցի հանրային միջոցառումներին՝ բուժման ծրագրի հետ կապված:
2018 թվականի օգոստոսին Ասմա Ասադի մոտ կրծքագեղձի չարորակ ուռուցք էր հայտնաբերվել։ 2019 թվականի հունվարի վերջին բժիշկները հաջողությամբ հեռացրել էին ուռուցքը։ 2019 թվականի օգոստոսին նախագահական գրասենյակը հայտարարել էր Ասմա Ասադի ամբողջական ապաքինման մասին։