ԵՐԵՎԱՆ, 20 մայիսի – Sputnik. Ռուսաստանի արտգործնախարար Սերգեյ Լավրովը ցավակցություն է հայտնել Իրանի նախագահ Էբրահիմ Ռայիսիի և արտգործնախարար Հոսեյն Ամիր Աբդոլլահիանի մահվան կապակցությամբ: Տեղեկությունը հայտնում է ՌԴ արտաքին քաղաքական գերատեսչությունը։
Լավրովը նշել է, որ Ռայիսին և Աբդոլլահիանը իսլամական հանրապետության ականավոր քաղաքական գործիչներ էին և իսկական հայրենասերներ:
«Իրանի նախագահն ու արտգործնախարարը մեր երկրի իրական, վստահելի բարեկամներ էին: Անգնահատելի է նրանց դերը ռուս-իրանական փոխշահավետ համագործակցության և վստահելի գործընկերության ամրապնդման գործում Անկեղծորեն ցավակցում ենք մահացածների հարազատներին ու մերձավորներին, ինչպես նաև Իրանի բարեկամ ժողովրդին: Այս ողբերգական պահին մեր մտքերն ու սրտերը ձեզ հետ են», - նշել է ՌԴ արտգործնախարարը։
Հիշեցնենք` Իրանի նախագահ Էբրահիմ Ռայիսիին և արտգործնախարար Հոսեյն Ամիր Աբդոլլահիանին տեղափոխող ուղղաթիռը կործանվել է մայիսի 19-ին երկրի հյուսիս-արևմուտքում՝ Վերզեգանի շրջանում: Բարձրաստիճան պաշտոնյաները վերադառնում էին Արաքս գետի վրա հիդրոհանգույցների բացման արարողությունից, որին մասնակցում էր Ադրբեջանի նախագահ Իլհամ Ալիևը: Փրկարարների թիմերը մեկնել էին արտակարգ պատահարի վայր և որոնումներ իրականացրել ամբողջ գիշեր, նրանց աշխատանքը բարդացել էր մթության և տեղատարափի պատճառով:
Մայիսի 20-ի առավոտյան հայտնի դարձավ, որ հայտնաբերվել են ուղղաթիռի այրված բեկորները, իսկ ինքնաթիռում գտնվող բոլոր մարդիկ մահացել են։
Ուղղաթիռի կործանման հետևանքով մահացել են Իրանի նախագահ Էբրահիմ Ռայիսին, արտաքին գործերի նախարար Հոսեյն Ամիր Աբդոլլահիանը, Արևելյան Ադրբեջանի նահանգապետ Մալիք Ռահմաթին, Թավրիզում ուրբաթօրյա աղոթքի ղեկավար այաթոլլա Մոհամմադ Ալի ալ–է–Հաշեմը, ԻՀՊԿ ներկայացուցիչ Սեյեդ Մեհդի Մուսավին ու անձնակազմի 3 անդամները։