ԵՐԵՎԱՆ, 20 մայիսի – Sputnik. ՀՀ Տավուշի մարզի Կիրանց գյուղում հացի, մթերքի խնդիր չկա։ Այս հայտարարությունը տարածել է ՀՀ Տավուշի մարզպետի աշխատակազմը։
Ավելի վաղ ԶԼՄ–ները տեսանյութ էին հրապարակել` նշելով, որ ոստիկանական օպերացիայի պատճառով Կիրանցում հացի և մթերքի խնդիր կա։ Քանի որ ճանապարհը փակել են ու թույլ են տալիս գյուղ մուտք գործել միայն բնակիչներին, մատակարարները, չկարողանալով մոտենալ գյուղին, հետ են գնում։
«Համացանցում տարածվող լուրերը, թե իբր Կիրանցում հացի, մթերքի խնդիր կա, չեն համապատասխանում իրականությանը»,– ասված է մարզպետի աշխատակազմի հայտարարությունում։
Հիշեցնենք` «Հայաստան» խմբակցության ներկայացուցիչ Ագնեսա Խամոյանը մայիսի 19-ին Sputnik Արմենիային հայտնել էր, որ 6 պատգամավոր Տավուշի մարզ է գնացել գյուղացիներին աջակցելու համար, սակայն նրանց չեն թողել հասնել գյուղ։ Ավելի ուշ ԱԱԾ–ն հայտարարեց, որ սահմանապահ զորքերը Տավուշի մարզի Կիրանց գյուղի հատվածում իրականացնում են ՀՀ պետական սահմանի պահպանությունը ստանձնելուն ուղղված նախապատրաստական աշխատանքներ, և ելնելով անվտանգային և օպերատիվ անհրաժեշտությունից` Կիրանց բնակավայրում հաշվառում չունեցող քաղաքացիների մուտքը բնակավայր ժամանակավորապես սահմանափակվել է։