«Հյուսիս-հարավ» տրանսպորտային միջանցքը Սուեզի ջրանցքի փաստացի այլընտրանք է․ ՌԴ փոխվարչապետ

ԵՐԵՎԱՆ, 19 մայիսի — Sputnik. «Հյուսիս-հարավ» միջազգային տրանսպորտային միջանցքը Սուեզի ջրանցքի փաստացի այլընտրանքն է։ Այդ մասին հայտարարել է ՌԴ փոխվարչապետ Մարատ Խուսնուլինը aif-ru-ին տված հարցազրույցում։ Նրա խոսքով՝«Հյուսիս-հարավ» տրանսպորտային միջանցքի շինարարության մեջ մեծ առաջխաղացում կա։

Իր հերթին Ռուսաստանը սինխրոնացնում է շինարարության ծրագրերը Ղազախստանի գործընկերների հետ։ ՌԴ փոխվարչապետն ընդգծել է, որ միջազգային տրանսպորտային միջանցքի նախագիծը փաստացի այլընտրանք է Սուեզի ջրանցքին։ Ռուսաստանը, որտեղ կա հզոր ջրային զարկերակ՝ Վոլգա գետը, որը հարմար ճանապարհ է բացում դեպի Կասպից ծով, իհարկե, պետք է զարգացնի բեռների արագ փոխադրումը տրանսպորտի մի տեսակից մյուսը։

«Հյուսիս-հարավ» տրանսպորտային միջանցքի մասին միջազգային համաձայնագիրը ստորագրվել է 2000 թ-ի սեպտեմբերի 12-ին Սանկտ Պետերբուրգում:

Նախագիծն իրենից ներկայացնում է 7,2 հազար կմ երկարությամբ տրանսպորտային միջանցք, որը պետք է կապ ապահովի Բալթյան տարածաշրջանի և Հնդկաստանի միջև՝ Իրանի և Ռուսաստանի միջոցով: Միջանցքի թողունակությունը տարեկան 20-30 մլն տոննա բեռ է։ Ընդ որում, Երևանը «Հյուսիս-հարավ» միջանցքի մասին համաձայնագրի լիիրավ մասնակից է դարձել դեռ հեռավոր 2004 թ-ին։

Հայաստանը կարող է միջանցքին միանալ իր համանուն նախագծով՝ «Հյուսիս– հարավ» ավտոմայրուղով։ Այսպես Հնդկաստանից ապրանքները կարող են տեղափոխվել Իրան, այնուհետև՝ Հայաստան և արդեն այստեղից՝ Ռուսաստան (նավահանգիստներով կամ «Վերին Լարս» անցակետով)։ Դա Հայաստանի համար համագործակցության հնարավորություններ կբացի համաձայնագրի մասնակից մյուս երկրների (Ռուսաստան, Իրան, Հնդկաստան, Օման, Ղազախստան, Բելառուս և այլն) հետ՝ ենթակառուցվածքների զարգացման, միջազգային փոխադրումների, սահմանների հատման ընթացակարգերի պարզեցման և այլ հարցերի առումով։