ԵՐԵՎԱՆ, 18 մայիսի – Sputnik. ԱՊՀ մասնակից պետությունների սահմանապահ գերատեսչությունների սահմանապահ վերահսկողության մարմինների ղեկավարները Տաշքենդում կայացած հանդիպմանը քննարկել են սահմանային վերահսկողության կատարելագործումը անվտանգության սպառնալիքների աճի ֆոնին։ Տեղեկությունը հրապարակվել է ԱՊՀ գործադիր կոմիտեի կայքում։
Սահմանապահ զորքերի Հրամանատարների խորհրդի պլանային միջոցառումը կազմակերպել են Ուզբեկստանի ՊԱԾ սահմանապահ զորքերը։ Հանդիպմանը մասնակցել են Հայաստանի, Բելառուսի, Ղազախստանի, Ղրղզստանի, Ռուսաստանի Դաշնության, Տաջիկստանի, Ուզբեկստանի սահմանապահ գերատեսչությունների, ինչպես նաև Հրամանատարների խորհրդի համակարգող ծառայության ներկայացուցիչները:
Աշխատանքային հանդիպման մասնակիցները մտքեր են փոխանակել սահմանային վերահսկողության մարմինների համագործակցության արդիական հարցերի շուրջ և քննարկել համատեղ գործունեության կատարելագործման ուղղությունները, այդ թվում՝ տեղեկատվական փոխանակման զարգացման և ԱՊՀ մասնակից պետությունների տարածք ահաբեկչական և ծայրահեղական գործունեության մեջ ներգրավված անձանց ներթափանցմանը հակազդելու ուղղությամբ։