ԵՐԵՎԱՆ, 18 մայիսի – Sputnik․ Ոչ մի գործողություն չի արվել, զրպարտողները պատասխանատվության չեն կանչվել։ Այսօր լրագրողների հետ զրույցում այս մասին ասաց Տավուշի թեմի առաջնորդ Բագրատ սրբազանը՝ անդրադառնալով ԱԱԾ-ին և դատախազությանը հանցագործության մասին ներկայացրած հաղորդմանը։
Նշենք, որ իշխանամերձ շրջանակները մի շարք տեղեկություններ էին տարածել «Տավուշը հանուն հայրենիքի» շարժման առաջնորդ Բագրատ սրբազանի մասին։ Սրբազանն իրեն զրպարտելու համար հանցագործության մասին հաղորդում էր ներկայացրել։ Նա նշեց, որ պետք է դատի տալ նրանց, ովքեր անգործությամբ են զբաղված, որովհետև զրպարտողները մինչև հիմա պատասխանատվության չեն կանչվել։ Օգտվելով առիթից՝ Բագրատ սրբազանը դիմեց ԱԱԾ տնօրեն Արմեն Աբազյանին։
«Գիտեմ, որ պարոն Աբազյանը լսում է, դատախազությունը լսում է․ ես հանցագործության մասին հաղորդում եմ տվել։ Այդ մարդկանց պետք է ուղղակի քրեական պատասխանատվության ենթարկեք զրպարտության համար»,- հայտարարեց սրբազանը։
Հիշեցնենք՝ ապրիլի 29-ին «Տավուշը հանուն հայրենիքի» շարժումը հանցագործության մասին հաղորդում է ներկայացրել՝ պահանջելով 24 ժամվա ընթացքում կա՛մ քրեական վարույթ նախաձեռնել և պատասխանատվության կանչել Բագրատ սրբազանին, կա՛մ սուտ մատնության համար պատասխանատվության կանչել իշխանական civiknews լրատվականի լրագրողին։ Վերջինս սրբազանին մեղադրել էր «ռուսական ԿԳԲ-ի գործակալ լինելու, «Կրեմլից» միլիոնավոր դոլարներ ստանալու, հայ-ադրբեջանական պատերազմ հրահրելու» մեջ։