ԵՐԵՎԱՆ, 16 մայիսի – Sputnik. Ոստիկանական զորքերին 100 հազարական դրամ պարգևավճար են փոխանցել հակաիշխանական ցույցերը վայրագորեն ցրելու դիմաց։ Այս մասին գրում է «Հրապարակ» օրաթերթը։
Թերթի ոստիկանության աղբյուրները փոխանցել են, որ խոսքն այն ոստիկանների մասին է, որոնք այս օրերին ջանասիրաբար զբաղված են Նիկոլ Փաշինյանի աթոռը պահելու գործով և վայրագորեն ցրում են հակաիշխանական ցույցերը, բերման ենթարկում մարդկանց։
«ՆԳ նախարարի մամուլի քարտուղար Նարեկ Սարգսյանը մեր հարցին ի պատասխան ասաց․ «Ոստիկանության զորքերը պարգևավճարներ չեն ստացել»։ Այլ պատասխան չէինք էլ ակնկալում, քանի որ դա չի եղել օրինական հրամանով, այլ հաշիվներին փոխանցել են գումար՝ շեշտելով, որ լավ ծառայության դիմաց է»,–գրում է թերթը։
«Հրապարակին» իր աղբյուրները ասել են նաև, որ ՆԶ հրամանատար Հայկ Բաբայանի կինը` Հասմիկ Շահնազարյանը, մասնակցել է Աննա Հակոբյանի կազմակերպած մեկ միլիոնանոց ընթրիքին:
«ՆԳ համակարգում ակտիվ խոսում են, որ ներքին զորքերի հրամանատարը բոլոր ֆրոնտներում անձնուրաց ծառայում է Նիկոլ Փաշինյանին, քանի որ ակնկալում է առաջիկայում գեներալի կոչում ստանալ և նշանակվի առաջիկայում ստեղծվելիք Ազգային գվարդիայի հրամանատար»,–գրում է թորթը:
Առավել մանրամասն թերթի այսօրվա համարում։
Նշենք, որ վերջին օրերին «Տավուշը հանուն հայրենիքի» շարժումը հանրահավաքներ և անհնազանդության խաղաղ ակցիաներ է իրականացնում հիմնականում մայրաքաղաքում։ Ակցիանները, բիրտ ուժ կիրառելով, ցրում են ոստիկանության ծառայողները։
Հիշեցնենք, որ հայ–ադրբեջանական սահմանազատումից դժգոհ քաղաքացիները տևական ժամանակ ակցիաներ էին անում Տավուշի մարզում։ «Տավուշը հանուն հայրենիքի» շարժման անդամներն ու նրանց կողմնակիցները մայիսի 4-ին որոշեցին Կիրանց գյուղից երթով գալ Երևան։ Մայիսի 9-ին նրանք հասան մայրաքաղաք։ Այդ օրը Հանրապետության հրապարակում հանրահավաք տեղի ունեցավ, և շարժման առաջնորդ Բագրատ սրբազանը ՀՀ վարչապետ Նիկոլ Փաշինյանին մեկ ժամ ժամանակ տվեց հրաժարականի համար, ինչը տեղի չունեցավ։ Դրանից հետո նա կոչ արեց մայիսի 10-ից անհնազանդության խաղաղ ակցիաներ սկսել ամբողջ հանրապետությունում։