ԵՐԵՎԱՆ, 16 մայիսի – Sputnik. 2018 թ. հետո ՀՀ–ում պետպատվերի ֆինանսավորումը կրկնապատկվել է, իսկ մեխանիզմները լավարկվել են: ՀՀ կառավարության նիստի ժամանակ հայտարարեց վարչապետ Նիկոլ Փաշինյանը։
ՀՀ կառավարության այսօրվա որոշմամբ՝ բյուջեի վերաբաշխման արդյունքում 3 մլրդ դրամ կհատկացվի առողջապահական ծառայությունների ֆինանսավորմանը։
ՀՀ առողջապահության նախարար Անահիտ Ավանեսյանը նշեց, որ այդ գումարից շտապօգնության ծառայություններին կուղղվի 400 մլն դրամ, հեմոդիալեզին՝ 500 մլն դրամ, ուռուցքաբանական և արյունաբանական հիվանդությունների բուժմանը՝ 300 մլն դրամ, սոցիալապես անապահով և հատուկ խմբերում ընդգրկվածների բուժօգնության համար՝ 1.5 մլրդ դրամ, փոխպատվաստման ծառայություններին՝ 200 մլն դրամ, ինֆեկցիոն հիվանդությունների բուժմանը՝ 100 մլն դրամ։
«Այս ավելացումներով շարունակում ենք հանձնառությունը՝ տարեցտարի ավելացնել բժշկական օգնության հասանելիությունը բնակչությանը»,– ընդգծեց Ավանեսյանը։
Նա տեղեկացրեց, որ այդ ավելացումները կապված են ԼՂ–ից տեղահանվածների համար բուժօգնության հավելյալ ծավալներ ներդնելու հետ։