ԵՐԵՎԱՆ, 15 մայիսի – Sputnik. Այս տարի Վերակառուցման և զարգացման եվրոպական բանկը (ՎԶԵԲ) պատրաստվում է մոտ 500 մլն եվրո ներդնել Հայաստանում: Այս մասին Վերակառուցման և զարգացման եվրոպական բանկի տարեկան ժողովի շրջանակներում Երևանում անցկացված ՀՀ ներդրումային հնարավորությունների նստաշրջանի ժամանակ հայտարարել Է բանկի նախագահ Օդիլ Ռենո–Բասսոն:
Նրա խոսքով՝ այդ գումարի մեջ է մտնում այսօր ստորագրված 236 մլն եվրո վարկը, որը նախատեսված է Հյուսիս–Հարավ մայրուղու կառուցման համար (Սիսիան–Քաջարան հատվածում): Նա ընդգծեց, որ սա ՀՀ պատմության մեջ բանկի ամենախոշոր համաձայնագիրն է։
ՎԶԵԲ–ը նաև պատրաստվում է ՀՀ կառավարությանն առաջարկել նոր նախագծեր` ԼՂ–ից բռնի տեղահանված անձանց աշխատանքի տեղավորման, այդ թվում՝ նրանց փոքր բիզնեսի զարգացման համար:
Բանկը մտադիր է նաև տարեկան ժողովի շրջանակներում վարկային գծերի վերաբերյալ 8 համաձայնագիր ստորագրել ՀՀ մասնավոր հատվածի հետ, որոնցից մեկը բանկերից մեկի հետ ստորագրվել է նախօրեին:
ՎԶԵԲ-ը մտադիր է հետագայում ևս աջակցել ՀՀ ֆինանսական հատվածին, այդ թվում՝ կապիտալի շուկայի զարգացմանն ուղղված ծրագրերի իրականացման միջոցով: Նախատեսվում է ակտիվացնել նաև խորհրդատվական աջակցությունը ՀՀ կառավարությանն առընթեր ներդրումային խորհրդին։
Ռենո–Բասսոն նաև հիշեցրել է, որ Երևանն առաջիններից էր, որ միացավ ՎԶԵԲ–ի «Կանաչ քաղաքներ» նախագծին, որտեղ ներդրումներ են իրականացվում CO2 արտանետումները նվազեցնող նախագծերում: Դրանցից մեկը Երևանի քաղաքապետարանի վարկն էր՝ հեղուկ գազով ավտոբուսներ գնելու համար։ Այս նախագծից դուրս ՎԶԵԲ–ը նաև վարկավորել է Սևանի ափին մոտ գտնվող «Մասրիկ–1» խոշոր արևային կայանի կառուցումը:
Ընդհանուր առմամբ ՎԶԵԲ ներդրումների ընդհանուր ծավալը ՀՀ–ում կազմել Է ավելի քան 2,1 մլրդ եվրո: