Հունաստանի արտգործնախարարը հայտարարել է թուրք-հունական հարաբերությունների նոր փուլի մասին

ԵՐԵՎԱՆ, 14 մայիսի – Sputnik. Անկարայում Թուրքիայի և Հունաստանի ղեկավարների հանդիպումից հետո երկու երկրների հարաբերությունները նոր փուլ են թևակոխում։ Այս մասին RT հանրային հեռուստատեսությանը տված հարցազրույցում հայտարարել է Հունաստանի արտգործնախարար Յորգոս Գերապետրիտիսը։

Մայիսի 13-ին Անկարայում կայացել են Թուրքիայի նախագահ Ռեջեփ Թայիփ Էրդողանի և Հունաստանի Հանրապետության վարչապետ Կիրիակոս Միցոտակիսի բանակցությունները։ Սա վերջին տասը ամիսների ընթացքում չորրորդ հանդիպումն էր երկու առաջնորդների միջև։

Գերապետրիտիսը նշել է, որ մայիսի 13–ի հանդիպումից հետո թևակոխում են թուրք-հունական հարաբերությունների և քննարկումների նոր փուլ։ Նա շփումներն արդյունավետ է որակել` շեշտելով, որ կարևոր է դրանց պարբերական բնույթը։

Նրա կարծիքով` արդյունքներն արդեն տեսանելի են. վերջին տասը ամիսների ընթացքում վերացել է ցանկացած թշնամական հռետորաբանություն, լարվածություն չկա, նվազել է միգրանտների հոսքը և դադարել են օդային տարածքի խախտումները:

ՆԱՏՕ-ի դաշնակիցները՝ Հունաստանն ու Թուրքիան, վերջին մեկ տարում կարգավորում են հարաբերությունները երկարատև ճգնաժամից հետո։ 2023 թվականի դեկտեմբերի 7-ին Աթենքում տեղի ունեցան Թուրքիայի նախագահի բանակցությունները Հունաստանի վարչապետի հետ և տեղի ունեցավ համագործակցության բարձրագույն խորհրդի նիստը։ Արդյունքում ստորագրվել են բարեկամական հարաբերությունների և բարիդրացիության մասին հռչակագիր և 15 փաստաթուղթ՝ համաձայնագրեր, հուշագրեր, համատեղ հռչակագրեր:

Հունաստանը և Թուրքիան հայտարարում են, որ մտադիր են առաջ մղել դրական օրակարգն ու կենտրոնանալ համագործակցության վրա այնպիսի ոլորտներում, ինչպիսիք են ձեռնարկատիրությունը, զբոսաշրջությունը, տրանսպորտը, էներգետիկան, գիտությունը, տեխնոլոգիաները, գյուղատնտեսությունը, շրջակա միջավայրը, սոցիալական ապահովությունն ու առողջապահությունը, երիտասարդությունը, կրթությունն ու սպորտը: Այժմ դրական օրակարգում 34 թեմա կա։