ԵՐԵՎԱՆ, 14 մայիսի – Sputnik. ԵԱՏՄ գործակցության վերջին 3 տարվա ընթացքում Հայաստանի և Բելառուսի ապրանքաշրջանառությունն ավելացել է ավելի քան 4 անգամ։ Այսօր Երևանում Եվրասիական փորձագիտական ակումբի «Հայաստանը ԵԱՏՄ-ում. Եվրասիական տնտեսական ինտեգրման իրողություններն ու հեռանկարները» համաժողովում այս տվյալը ներկայացրեց Հայաստանում Բելառուսի դեսպան Ալեքսանդր Կոնյուկը։
«Ես Հայաստանում դիվանագիտական ծառայության եմ անցել 2020թ–ին, երբ մեր երկրների ապրանքաշրջանառությունը 50 մլն դոլար էր։ Այսօր մեր ապրանքաշրջանառությունը 220 մլն դոլար է, այսինքն` ավելացել է ավելի քան 4 անգամ, ընդ որում` արևմտյան պատժամիջոցների ֆոնին»,– ընդգծեց դեսպանը։
Անդրադառնալով ԵԱՏՄ գոյության 10-ամյա տնտեսական ցուցանիշներին` Կոնյուկն արձանագրեց, որ 2023թ–ի տվյալներով աճի տեմպը կազմել է շուրջ 105 տոկոս կամ 900 մլրդ դոլար։
«Կարևորը` մենք սովորել ենք իրար ավելի լավ լսել, և դա թերևս ամենակարևորն է։ Ո՛չ ՀՆԱ–ի, և ո՛չ էլ բնակչության իրական եկամուտների աճը հնարավոր չէին լինի, եթե մենք միասին չլինեինք։ ԵԱՏՄ–ն երիտասարդ կազմավորված կառույց է, բայց դրա զարգացման համար բավական մեծ ներուժ է ներդրվել»,– ասաց Բելառուսի դեսպանը` միաժամանակ հիշեցնելով, որ չնայած առկա ձեռքբերումներին` ԵԱՏՄ–ում նաև բազմաթիվ չլուծված հարցեր են մնում, որոնք դեռ պետք է լուծում ստանան։
Հիշեցնենք, որ Հայաստանը 2024 թ-ի հունվարի 1-ից ստանձնել է ԵԱՏՄ մարմիններում նախագահությունը։ Ամբողջ տարվա ընթացքում ՀՀ-ն նախագահելու է Եվրասիական տնտեսական բարձրագույն խորհրդում, Եվրասիական միջկառավարական խորհրդում և Եվրասիական տնտեսական հանձնաժողովի խորհրդում: