ԵՐԵՎԱՆ, 13 մայիսի – Sputnik. Տավուշի թեմի առաջնորդ Բագրատ սրբազանն այսօր Երևանում ոստիկաններին հորդորեց բռնի ու անհամաչափ ուժ չկիրառել ցուցարարների նկատմամբ։
«Հանդարտ մնացեք, տղե՛րք, ձեզ փչացնում են, փչացրել են, բայց դուք հնարավորություն ունեք վերականգնվելու։ Այս մարդիկ նաև ձեզ համար են պայքարում։ Հիշեք, որ տուն եք գնալու... Երեկ էլ ձեզ համար նահատակված տղայի մորն եք քաշքշել»,– ասաց նա։
Նա ոստիկաններին կոչ արեց նաև նույն եռանդով թշնամու դեմ պայքարել, այլ ոչ թե այն մարդկանց դեմ, որոնք փողոց են դուրս եկել նաև նրանց ազատագրելու համար։
Սրբազանը նշեց, որ այս օրերին մարդկանց նաև հոգեբանական ահաբեկության են ենթարկում։
Նշենք, որ «Տավուշը հանուն հայրենիքի» շարժման անդամները ժամը 08։00-ից մայրաքաղաքում ավելի քան 20 փողոց են փակել։ Քաղաքացիներն անհնազանդության և իրազեկման ակցիաներ են իրականացրել։ Ժամը 10։30-ի դրությամբ Երևանում անհնազանդության ակցիաների 134 մասնակցի են տարել ոստիկանություն։
Հիշեցնենք, որ հայ–ադրբեջանական սահմանազատումից դժգոհ քաղաքացիները տևական ժամանակ ակցիաներ էին անում Տավուշի մարզում։ «Տավուշը հանուն հայրենիքի» շարժման անդամներն ու նրանց կողմնակիցները մայիսի 4-ին որոշեցին Կիրանց գյուղից երթով գալ Երևան։ Մայիսի 9-ին նրանք հասան մայրաքաղաք։ Այդ օրը Հանրապետության հրապարակում հանրահավաք տեղի ունեցավ, և շարժման առաջնորդ Բագրատ սրբազանը ՀՀ վարչապետ Նիկոլ Փաշինյանին մեկ ժամ ժամանակ տվեց հրաժարականի համար, ինչը տեղի չունեցավ։ Դրանից հետո նա կոչ արեց մայիսի 10-ից սկսել անհնազանդության խաղաղ ակցիաներ ամբողջ հանրապետությունում։