ԵՐԵՎԱՆ, 10 մայիսի – Sputnik. ՀՀ վարչապետի թեկնածուների անուններ քննարկվում են։ Երևանի Հանրապետության հրապարակում ճեպազրույցի ժամանակ ասաց Բագրատ սրբազանը։
«Ձեր սիրած ու չսիրած անուններն են քննարկվում։ Ի վերջո, համաձայնություն կգոյանա։ Դա կլինի արդեն 2–րդ փուլը. հիմա մենք ժողովրդին արթնացնելու գործընթացի մեջ ենք»,– հայտարարեց նա։
Ինչ վերաբերում է ՀՀ 2–րդ նախագահ Ռոբերտ Քոչարյանի թեկնածությանը, ապա սրբազանն ասաց, որ նման հարց չի եղել, մարդիկ միֆ են ստեղծել։
«Ես ՀՀ 2–րդ նախագահին կյանքիս մեջ մի անգամ եմ հանդիպել` 2001 թվականին ընդամենը 5 րոպեով։ Եթե ես որևէ մեկի հետ հանդիպեմ, թաքցնելու բան չունեմ։ Երեկ ես գնացել էի ոտքերս վիրակապելու, ասում են` գնացել եմ Ռոբերտ Քոչարյանի հետ հանդիպելու։ Իրենք ստախոս են։ Քոչարյանի թեկնածության հարց չի քննարկվել»,– ընդգծեց Բագրատ սրբազանը։
Ինչ վերաբերում է ՀՀ մարդու իրավունքների նախկին պաշտպան Արման Թաթոյանի թեկնածությանը, ապա այդ հարցի քննարկումը, նրա խոսքով` հնարավոր է։
«Մարդիկ իմ անունն էլ են քննարկում»,– նշեց նա։
Բագրատ սրբազանի խոսքով` իրենց գործը մինչ այս պահը չի եղել քաղաքական գործընթաց։
«Խորհրդարանական գործիչների հետ հանդիպեցինք ու փորձեցինք հասկանալ, թե ինչ ուղով կգնան գործընթացները։ Իրենք պատրաստ են այս փուլում գործընթացը շարունակելու ու օրինական ճանապարհով այս ամենն ավարտելու։ Այդ ժամանակ էլ պահանջվելու է վարչապետի թեկնածու և այդ ժամանակ էլ կհնչի անուն»,– վստահեցրեց սրբազանը։
Ըստ նրա` այս շարժումը բոլորիս համար կենսական նշանակություն ունի, քանի որ հասել ենք կրիտիկական մի կետի, որից այն կողմ ուղղակի անցնել չենք կարող։
«Մեր երկիրը պարզապես ծվեն–ծվեն լինելով, անհասկանալի ընթացքի մեջ է` անհասկանալի երաշխիքներով, առանց որևէ ներքին ու արտաքին պաշտպանության վերածվելու է պարզապես հողատարածքի»,– նշեց սրբազանը։
Նրա խոսքով` այս փուլում այս շարժումն աղետի կանխումն է։
Հիշեցնենք՝ «Տավուշը հանուն հայրենիքի» շարժման կողմնակիցները Տավուշի թեմի առաջնորդ Բագրատ արքեպիսկոպոս Գալստանյանի գլխավորությամբ Կիրանցից քայլերթով շարժվել են Երևան` միակողմանի սահմանազատման գործընթացը կասեցնելու նպատակով։
Մայիսի 9-ին երթի մասնակիցները հասան Երևանի Հանրապետության հրապարակ, որտեղ մեծ հանրահավաք անցկացվեց։ Շարժման առաջնորդ Բագրատ սրբազանը ՀՀ վարչապետ Նիկոլ Փաշինյանին մեկ ժամ ժամանակ տվեց հրաժարականի համար, որը տեղի չունեցավ։
Դրանից հետո նա կոչ արեց մայիսի 10-ին սկսել անհնազանդության խաղաղ ակցիաներ ամբողջ հանրապետությունում։