ԵՐԵՎԱՆ, 10 մայիս – Sputnik. Տավուշում սահմանազատման արդյունքում ՀՀ պաշտպանությունը պարզապես կքանդվի, կառաջանա ճեղքվածք։ Հանրապետության հրապարակում հանրահավաքից առաջ լրագրողների հետ զրույցում ասաց ՀՀ ԶՈւ գլխավոր շտաբի պետի նախկին առաջին տեղակալ Տիրան Խաչատրյանը։
Ըստ նրա` հետո այդ ճեղքվածքը փակելու համար տարիներ կպահանջվեն։
«Արդյունքում ոչ միայն գյուղերն են խոցելի դառնում, այլ նաև ամբողջ ՀՀ–ն, երկրի լինելիությունը։ Այս ամենից հետո մենք պաշտպանական, ամրաշինական, նախապատրաստվածության առումով այլևս ոչինչ չենք ունենա։ Դա կդառնա մի գոտի, որտեղից հակառակորդն իր ուժերն ու միջոցները անարգել կկարողանա տեղաշարժել ներս ու ծավալել»,– ասաց նա։
Հիշեցնենք` Հայաստանի և Ադրբեջանի սահմանազատման հարցերով հանձնաժողովներն ապրիլի 19-ին պայմանավորվեցին սահմանազատումը սկսել Տավուշի մարզից։ Սահմանագծի տվյալ հատվածների նկարագրությունը կազմվելու է` հաշվի առնելով տեղանքում գեոդեզիական չափումների արդյունքում կատարված կոորդինատների հստակեցումը, որը պետք է ավարտվի մինչև 2024 թ. մայիսի 15-ը:
ՀՀ վարչապետի աշխատակազմը հայտարարեց, որ Ադրբեջանն այս ամենի արդյունքում 2.5 գյուղ է ստանում, իսկ Հայաստանի Հանրապետությունը` անվտանգային ռիսկերի նվազեցում։ Սահմանազատումից հետո չորս գյուղերի հատվածում զինված ուժերը հետ կքաշվեն և իրենց տեղը կզիջեն սահմանապահ զորքերին:
Հայ–ադրբեջանական սահմանին արդեն 40 սահմանային սյուն է տեղադրվել։
«Տավուշը հանուն հայրենիքի» շարժման կողմնակիցները Տավուշի թեմի առաջնորդ Բագրատ արքեպիսկոպոս Գալստանյանի գլխավորությամբ Կիրանցից երթով եկել են Երևան` միակողմանի սահմանազատման գործընթացը կասեցնելու նպատակով։
Մայիսի 9-ին երթի մասնակիցները հասան Երևանի Հանրապետության հրապարակ, որտեղ մեծ հանրահավաք անցկացվեց։ Շարժման առաջնորդ Բագրատ սրբազանը ՀՀ վարչապետ Նիկոլ Փաշինյանին մեկ ժամ ժամանակ տվեց հրաժարականի համար, ինչը տեղի չունեցավ։
Դրանից հետո նա կոչ արեց մայիսի 10-ին սկսել անհնազանդության խաղաղ ակցիաներ ամբողջ հանրապետությունում։
Այս պահին Երևանի Հանրապետության հրապարակում կրկին հանրահավաք է ընթանում։