ԵՐԵՎԱՆ, 8 մայիսի – Sputnik. Գազայի հատվածի հարավում գտնվող «Ռաֆահ» անցակետը շարունակում է փակ մնալ Գազա մարդասիրական օգնություն հասցնելու համար: Ժնևում կայացած ճեպազրույցի ժամանակ այս հայտարարությունն է արել Առողջապահության համաշխարհային կազմակերպության (ԱՀԿ) ղեկավար Թեդրոս Գեբրեյեսուսը։
«Եգիպտոսից Գազա տանող «Ռաֆահ» անցակետը շարունակում է փակ մնալ, չնայած որ այն մատակարարումների հիմնական մուտքի կետն է։ Վառելիքը, որը մենք սպասում էինք, թե այսօր կներմուծվի, չի ներմուծվել, ինչը նշանակում է, որ մեր ունեցածը ընդամենը երեք օր կբավականացնի Գազայի հարավում առողջապահական ծառայությունների աշխատանքն ապահովելու համար»,– ասել է նա։
Մայիսի 7-ի գիշերը ՑԱԽԱԼ-ի ցամաքային ուժերը մտել են Ռաֆահ, որը համարվում է ՀԱՄԱՍ-ի վերջին հենակետը պաղեստինյան անկլավում: Իսրայելական տանկերը Գազայի հատվածի կողմից օպերատիվ վերահսկողություն են հաստատել «Ռաֆահ» անցակետի տարածքի նկատմամբ։ Գործողության մեկնարկից անմիջապես առաջ եւ դրա անցկացման ընթացքում հաճախակի են դարձել Գազային սահմանակից շրջանների ուղղությամբ ծայրահեղականների կրակոցները:
Մայիսի 5-ին Ռաֆահից արձակված ականանետային կրակոցների հետևանքով ՑԱԽԱԼ-ի 4 զինվորներ են սպանվել «Քերեմ Շալոմ» անցակետի մոտ։
Հիշեցնենք` 2023 թ. հոկտեմբերի 7-ի առավոտյան Իսրայելը Գազայի հատվածից աննախադեպ հրթիռային հարձակման ենթարկվեց։ Իսրայելի բանակի մամուլի ծառայությունից հայտնեցին, որ ծայրահեղականներն ավելի քան 3 հազար հրթիռ են արձակել: Բացի այդ, տասնյակ ահաբեկիչներ ներխուժել են Իսրայելի հարավում գտնվող սահմանամերձ շրջաններ։ Պաղեստինյան ՀԱՄԱՍ շարժման ռազմական թևը հայտարարեց, որ Իսրայելի դեմ «Ալ Աքսայի ջրհեղեղ» գործողություն է անցկացնում: Իսրայելի պաշտպանության բանակն էլ (ՑԱԽԱԼ) հայտնեց Գազայի հատվածում ՀԱՄԱՍ-ի դեմ «Երկաթե թրեր» գործողության մեկնարկի մասին։