ԵՐԵՎԱՆ, 8 մայիսի – Sputnik․ Տավուշի մարզի 36-ամյա բնակիչը կալանավայրից համագործակցել է Երևանում բնակվող 38-ամյա ծանոթի հետ ու համակարգչային հափշտակություն կատարել, տուժողներին պատճառված վնասը գերազանցում է 102 միլիոն դրամը։ Տեղեկությունը հայտնում է ՀՀ քննչական կոմիտեի մամուլի ծառայությունը։
Ըստ ՔԿ–ի` 36-ամյա տղամարդը 2020թ․ օգոստոսից մինչև 2022թ․ դեկտեմբերը «Ֆեյսբուքում» ստեղծել է տարբեր անվանումներով անհատական էջեր և նամակագրություն վարել տարբեր օգտատերերի հետ։
«Վերջիններիս անվամբ «Իդրամ» էլեկտրոնային դրամապանակ գրանցելուն, դրանք նույնականացնելուն աջակցելու և բոնուսներ տրամադրելու կեղծ պատրվակներով ստացել է նրանց բջջային հեռախոսահամարները, հեռախոսահամարներին «Իդրամ» վճարային համակարգից ստացված ծածկագրերը, ուղղորդել է նշված անձանց վճարային համակարգում դրամապանակները նույնականացնելու գործընթացում»,- ասված է հաղորդագրությունում։
Տղամարդը էլեկտրոնային դրամապանակներին կցված բանկային քարտերից առանձնապես խոշոր չափերով գումարներ է հափշտակվել և փոխանցել տարբեր խաղային կայքերում իր կողմից օգտագործվող հաշիվներին:
Բացի այդ, քննությամբ դեռևս չպարզված այլ անձի հետ համաձայնության է եկել նաև այդ գումարները հափշտակելու եղանակների շուրջ։
Այդ անձը 2022- 2023թթ․ «WhatsApp» կամ «Viber» հավելվածներով կատարված հեռախոսազանգերի միջոցով տարբեր քաղաքացիներից հավաքագրել է ծածկագրեր, մուտք է գործել նրանց անվամբ գրանցված տարբեր էլեկտրոնային դրամապանակներ և տարբեր ընկերությունների «Оnline banking» հավելվածներ: Այնուհետև անձանց անվամբ առցանց եղանակով ձևակերպել է վարկային պայմանագրեր, հափշտակել փոխանցված գումարները։
Նման եղանակներով կատարվել է ընդհանուր 152 դրվագ համակարգչային հափշտակություն։ Դրանց հետևանքով տուժողներին պատճառված ընդհանուր վնասը կազմել է 102.213.328 ՀՀ դրամ։
Ձեռք բերված փաստերի հիման վրա Տավուշի մարզի բնակչին մեղադրանք է ներկայացվել ՀՀ քրեական օրենսգրքի 257-րդ հոդվածի (համակարգչային հափշտակություն) 3-րդ մասի 3-րդ կետով, իսկ Երևանի 36-ամյա բնակչին ՀՀ քրեական օրենսգրքի 46-257-րդ (համակարգչային հափշտակության հանցափորձ) հոդվածի 3-րդ մասի 3-րդ կետով։
Նրանց մասով նախաքննությունն ավարտվել է, և վարույթի նյութերը, մեղադրական եզրակացությամբ, ուղարկվել են հսկող դատախազին: