ԵՐԵՎԱՆ, 8 մայիսի – Sputnik. ԵԱՏՄ բարձրագույն խորհրդի ընդլայնված նիստի ավարտին անդամ պետությունների ղեկավարները ստորագրեցին 13 փաստաթուղթ, որոնց վերաբերյալ որոշումները կայացվել էին այսօր։
Փաստաթղթերի թվում էր 2023–2025 թթ. Եվրասիական տնտեսական ինտեգրման զարգացման ռազմավարական ուղղությունների և ԵԱՏՄ միջազգային գործունեության հիմնական ուղղությունների կատարումը:
Ստորագրվեցին նաև Մոնղոլիայի հետ ժամանակավոր առևտրային համաձայնագրի կնքման շուրջ բանակցությունների մեկնարկի մասին և Վիետնամի հետ ապրանքների ծագման հավաստագրման ու ստուգման շրջանակներում տեղեկատվության էլեկտրոնային փոխանակման մասին արձանագրությունները:
Նիստի վերջում ՌԴ նախագահ Վլադիմիր Պուտինը ԵԱՏՄ անդամ պետությունների ղեկավարներին հրավիրեց ոչ ֆորմալ աշխատանքային ճաշի, որին ներկա կլինեն նաև միությանը չանդամակցող Տաջիկստանի ու Թուրքմենստանի նախագահները։