ԵՐԵՎԱՆ, 7 մայիսի – Sputnik. ԱԺ «Քաղաքացիական պայմանագիր» խմբակցության պատգամավոր Արթուր Հովհաննիսյանը հրաժարվեց մեկնաբանել Տավուշի թեմի առաջնորդ Բագրատ սրբազանի երեկվա հայտարարությունը, որ ՔՊ–ի բարձրաստիճան անդամներն արդեն իսկ ներքին ուղերձներ են հղում, թե ինչպես կարող են միանալ «Տավուշը հանուն հայրենիքի» շարժմանը։
Խորհրդարանական ճեպազրույցի ժամանակ լրագրողներից մեկը հարցրեց` արդյոք ՔՊ–ն բացառում է, որ նման ուղերձներ հղողներ կլինեն, Հովհաննիսյանն էլ պատասխանեց, թե չգիտի ինչի մասին է խոսքը։
«Որևէ մեկնաբանություն չունեմ։ Ես չգիտեմ նման հայտարարությունների հիմքում ինչ կա առհասարակ և ինչի համար են արվում»,–ասաց նա։
Հովհաննիսյանը չմոռացավ հիշեցնել, որ 2018 թվականից հետո ՀՀ–ն ժողովրդավար երկիր է,ուստի հավաքների ազատությունն ապահովված է բոլորի համար։
Հիշեցնենք` Հայաստանի և Ադրբեջանի սահմանազատման հարցերով հանձնաժողովներն ապրիլի 19-ին պայմանավորվել են սահմանազատումը սկսել Տավուշի մարզից։ Սահմանագծի տվյալ հատվածների նկարագրությունը կազմվելու է` հաշվի առնելով տեղանքում գեոդեզիական չափումների արդյունքում կատարված կոորդինատների հստակեցումը, որը պետք է ավարտվի մինչև 2024 թ. մայիսի 15-ը:
ՀՀ վարչապետի աշխատակազմը հայտարարել է, որ Ադրբեջանն այս ամենի արդյունքում 2.5 գյուղ է ստանում, իսկ Հայաստանի Հանրապետությունը` անվտանգային ռիսկերի նվազեցում։ Կիրանց գյուղի հատվածում ճանապարհի մի քանի հարյուր մետրանոց հատվածի փոփոխություն կարվի, իսկ Ոսկեպարը ճանապարհի խնդիր չի ունենա։ Սահմանազատումից հետո չորս գյուղերի հատվածում զինված ուժերը հետ կքաշվեն և իրենց տեղը կզիջեն սահմանապահ զորքերին:
Տավուշի սահմանամերձ գյուղերի բնակիչներն ապրիլի 19-ից բողոքի ակցիաներ են անում Հայաստան-Վրաստան միջպետական ճանապարհին: Նրանք դեմ են սահմանազատման այն տարբերակին, որը համաձայնեցրել են Երևանն ու Բաքուն։
Չնայած այդ ամենին` հայ–ադրբեջանական սահմանին արդեն 40 սահմանային սյուն է տեղադրվել։
Սահմանազատման դեմ պայքարողները Տավուշի թեմի առաջնորդ Բագրատ արքեպիսկոպոս Գալստանյանի գլխավորությամբ Կիրանցից քայլերթով գալիս են Երևան` միակողմանի սահմանազատման գործընթացը կասեցնելու նպատակով։ Նրանք նախատեսում են Երևան հասնել մայիսի 9-ին։