ԵՐԵՎԱՆ, 7 մայիսի – Sputnik. «Տավուշը հանուն հայրենիքի» շարժման անդամները երթի 4-րդ օրն ավարտեցին Կոտայքի մարզի Չարենցավան քաղաքի Վերածննդի հրապարակում։
Տավուշի թեմի առաջնորդ Բագրատ արքեպիսկոպոս Գալստանյանը «Տավուշը հանուն հայրենիքի» շարժման երթի ավարտին հայտնեց, որ այսօր մարդիկ կմնան Չարենցավանում, որտեղ կնստեն, կխոսեն, որոշ հարցեր կքննարկեն։
Չնայած եղանակն այդքան էլ բարենպաստ չէ, կարկուտ և անձրև է տեղում, սակայն քաղաքացիներն ընդգծում են` նույնիսկ դա իրենց չի խանգարի։
«Խնդրում եմ` գնացեք հիմա տաք թեյ խմեք մալինայով, եթե չկա, ուրեմն հաղարջով։ Գնացեք, հանգստացեք, տաքացեք, ձեր մտքում վերարտադրեք այս օրը, ինչպես եք հաղթել ու, ու այդ մտքով վաղը կհանդիպենք»,– ասաց Բագրատ սրբազանը։
Մայիսի 8-ին շարժումը ժամը 13։00-ից կուղևորվի Աբովյան քաղաք, որտեղ երեկոյան լինելու է երիտասարդաց գիշեր։
Հիշեցնենք` Հայաստանի և Ադրբեջանի սահմանազատման հարցերով հանձնաժողովներն ապրիլի 19-ին պայմանավորվել են սահմանազատումը սկսել Տավուշի մարզից։ Սահմանագծի տվյալ հատվածների նկարագրությունը կազմվելու է` հաշվի առնելով տեղանքում գեոդեզիական չափումների արդյունքում կատարված կոորդինատների հստակեցումը, որը պետք է ավարտվի մինչև 2024 թ. մայիսի 15-ը:
ՀՀ վարչապետի աշխատակազմը հայտարարել է, որ Ադրբեջանն այս ամենի արդյունքում 2.5 գյուղ է ստանում, իսկ Հայաստանի Հանրապետությունը` անվտանգային ռիսկերի նվազեցում։ Կիրանց գյուղի հատվածում ճանապարհի մի քանի հարյուր մետրանոց հատվածի փոփոխություն կարվի, իսկ Ոսկեպարը ճանապարհի խնդիր չի ունենա։ Սահմանազատումից հետո չորս գյուղերի հատվածում զինված ուժերը հետ կքաշվեն և իրենց տեղը կզիջեն սահմանապահ զորքերին:
Տավուշի սահմանամերձ գյուղերի բնակիչներն ապրիլի 19-ից բողոքի ակցիաներ են անում Հայաստան-Վրաստան միջպետական ճանապարհին: Նրանք դեմ են սահմանազատման այն տարբերակին, որը համաձայնեցրել են Երևանն ու Բաքուն։
Չնայած այդ ամենին` հայ–ադրբեջանական սահմանին արդեն 40 սահմանային սյուն է տեղադրվել։
Սահմանազատման դեմ պայքարողները Տավուշի թեմի առաջնորդ Բագրատ արքեպիսկոպոս Գալստանյանի գլխավորությամբ Կիրանցից քայլերթով գալիս են Երևան` միակողմանի սահմանազատման գործընթացը կասեցնելու նպատակով։ Նրանք նախատեսում են Երևան հասնել մայիսի 9-ին։