ԵՐԵՎԱՆ, 6 մայիսի – Sputnik. Թուրքիայի խորհրդարանը բարձր գնաճի ֆոնին այս շաբաթ կքննարկի երկրում արհեստականորեն գները բարձրացնողներին պատժելու մասին օրինագիծը: Ekonomim թերթը հայտնում է, որ տուգանքը կարող է գերազանցել 31 հազար դոլարը։
Ավելի վաղ Թուրքիայի նախագահ Ռեջեփ Թայիփ Էրդողանը հայտարարել էր գները արհեստականորեն բարձրացնողներին պատժելու նոր միջոցների մասին:
«Նրանց վրա, ովքեր կխախտեն ապրանքի կամ ծառայության բացթողնման գնի չափազանց մեծ բարձրացման անթույլատրելիության մասին դրույթը, վարչական տուգանք կկիրառվի 100 հազար լիրայի չափով (ավելի քան 3 հազար դոլար փոխարժեքով) մինչև 1 միլիոն լիրայի չափով (ավելի քան 31 հազար դոլար) յուրաքանչյուր խախտման համար», – նշված է հրապարակման մեջ:
Նշվում է, որ շուկայում դեֆիցիտ ստեղծող, շուկայական հավասարակշռությունը և ազատ մրցակցությունը խախտող, ինչպես նաև ապրանքների նկատմամբ սպառողների հասանելիությունը խոչընդոտող գործողությունները կտուգանվեն 1-12 մլն լիրայի չափով (մոտ 373 հազար դոլար) յուրաքանչյուր խախտման համար:
«Նրանք, ովքեր ժամանակին չեն առաքում ապրանքը, կտուգանվեն 2,200 լիրա (68 դոլար) վարչական տուգանքով, իսկ նրանք, ովքեր խուսափում են ապրանքների կամ ծառայությունների վաճառքից, կտուգանվեն առնվազն 2,200 լիրա վարչական տուգանքով, բայց ոչ պակաս, քան ապրանքների կամ ծառայությունների ընդհանուր վաճառքի գնի 10%-ը, ներառյալ բոլոր հարկերը», - գրում է թերթը:
Թուրքիայում տարեկան գնաճը ապրիլին, պաշտոնական տվյալների համաձայն, մարտի 68,5 տոկոսից արագացել է մինչև 69,80 տոկոս: Սա առավելագույնն է 2022 թվականի նոյեմբերից, երբ տարեկան գնաճը կազմել է 84,39%։
Ընդ որում, ENG անկախ տնտեսագետների խումբն անցած ամսվա արդյունքներով տարեկան գնաճը գնահատել է 124,35 տոկոս, սպառողական գների աճը ապրիլին, նրանց տվյալներով, կազմել է 5,02 տոկոս: