ԵՐԵՎԱՆ, 3 մայիսի – Sputnik․ «Մեծ յոթնյակի» երկրների ներկայացուցիչները մասնավոր զրույցներում հայտարարում են, որ ռուսական ակտիվների ամբողջական բռնագրավման հարցն այլևս օրակարգում չէ: Այդպիսի տեղեկություն է հայտնել Financial Times թերթը։
«Չնայած Ուկրաինան շարունակում է պնդել, որ Ռուսաստանի ակտիվների ամբողջական բռնագրավում անցկացվի, G7-ի ներկայացուցիչները մասնավոր կարգով հայտարարում են, որ այդ թեման այլևս չի քննարկվում»,-տեղեկացրել է պարբերականը:
Նրա տվյալներով՝ G7-ի երկրները ներկայում ՌԴ–ի սառեցված ակտիվներից միջոցներ հանելու այլընտրանքային ուղիներ են փնտրում։ Թերթը հստակեցրել է, որ Եվրամիության երկրները վախենում են իրենց գործողություններին պատասխան միջոցառումներից, ուստի նախընտրում են հեռու մնալ այն ամենից, ինչը կարող է վերաբերել բուն ակտիվներին:
ՌԴ ԱԳՆ պաշտոնական ներկայացուցիչ Մարիա Զախարովան հայտարարել է, որ Ռուսաստանը կոշտ կարձագանքի ցանկացած ոչ բարեկամական գործողությունների՝ կապված Ռուսաստանին իր ինքնիշխան պահուստների նկատմամբ սեփականության իրավունքից զրկելու փորձերի հետ: Նա հստակեցրել է, որ կառավարությունում մի շարք տարբերակներ են դիտարկվում, որոնք թույլ կտան իրավական և տնտեսական ազդեցություն ունենալ նրանց վրա, ովքեր հույս ունեն հարստանալ ՌԴ-ին պատկանող ակտիվները գողանալու հաշվին։
ՌԴ նախագահի մամուլի քարտուղար Դմիտրի Պեսկովը հավաստիացրել է, որ Ռուսաստանը կօգտագործի բոլոր դատական մեխանիզմները Եվրամիության գործողություններին պատասխանելու համար, որպեսզի նրանց թույլ չտա սառեցված ռուսական ակտիվները օգտագործել Կիևին օգնելու համար: Կրեմլի ներկայացուցիչը զգուշացրել է, որ Մոսկվան փոխադարձության հիման վրա տարբեր մեթոդներ է ընտրելու պատասխան գործողությունների համար: Դրանք հայելային չեն լինելու, բայց կհամապատասխանեն երկրի շահերի ծավալին։