ԵՐԵՎԱՆ, 3 մայիսի – Sputnik. Ամերիկացի զինվորականները եղանակային պայմանների պատճառով նախօրեին դադարեցրել են Գազա մարդասիրական օգնություն հասցնելու համար նավամատույցի կառուցման աշխատանքները: Այս մասին հայտնում է ԱՄՆ զինված ուժերի կենտրոնական հրամանատարությունը (CENTCOM)։
«Երեկ CENTCOM–ը դադարեցրել է նավամատույցի կառուցումը Գազայի մոտակայքում»,– ասվում է X սոցիալական ցանցում CENTCOM–ի հաղորդագրության մեջ:
Նշվում է, որ կանխատեսվող վատ եղանակի պատճառով «զինվորների համար, որոնք աշխատում են նավամատույցի կառուցման վրա, վտանգավոր պայմաններ են ստեղծվել»:
Ռազմանավերը և հենց նավամատույցը եղանակային պայմանների պատճառով տեղափոխվել են Աշդոդ նավահանգիստ, այնտեղ զինվորականները կշարունակեն նավամատույցի հավաքման աշխատանքները:
Հիշեցնենք, որ 2023 թ. ապրիլի վերջին Պենտագոնում հայտնել էին, որ զինվորականները ձեռնամուխ են եղել Գազայի հատվածի ափերի մոտ ժամանակավոր նավամատույցի կառուցմանը՝ հույս ունենալով մայիսին սկսել ծովային ճանապարհով պաղեստինցիներին մարդասիրական օգնության մատակարարումը: Նավամատույցի երկայնքով նախատեսվում էր փոքր նավերով բեռներ տեղափոխել։ Նախատեսվում էր նաև, որ ԱՄՆ զինված ուժերը միայն ափերին մոտ գտնվող նավերի մոտ կլինեն՝ առանց ափ իջնելու: