ԵՐԵՎԱՆ, 3 մայիսի – Sputnik. ԱՄՆ կոնգրեսական Էնրիկե Ռոբերտո Կուելյարին և նրա կնոջը՝ Իմելդային մեղադրանք է առաջադրվել Ադրբեջանի նավթագազային ընկերությունից և մեքսիկական բանկերից մեկից կաշառք ստանալու համար։ Տեղեկությունը հայտնում է ԱՄՆ արդարադատության նախարարությունը:
Այսօր նրանց առաջին դատական նիստին էր, որին երկուսն էլ մասնակցում էին։
Ըստ գործի նյութերի՝ առնվազն 2014 թ. դեկտեմբերից մինչև 2021 թ. նոյեմբեր ընկած ժամանակահատվածում կոնգրեսականն ու նրա կինը կաշառքի տեսքով մոտ 600 հազար դոլար են ստացել Ադրբեջանի պետական նավթագազային SOCAR ընկերությունից, որն ամբողջությամբ վերահսկվում է Ադրբեջանի կառավարության կողմից, ինչպես նաև Մեխիկոյում տեղակայված բանկերից մեկից:
Լվացման նպատակով կաշառքները ձևակերպվել են որպես խորհրդատվական ծառայությունների մատուցման պայմանագրեր և միջնորդների միջոցով փոխանցվել են Իմելդա Կուելյարի անունով բացված կեղծ ընկերություններին։
Ստացված կաշառքի դիմաց Կուելյարը համաձայնել է լոբբինգ անել ի շահ Ադրբեջանի քաղաքականության, ինչպես նաև մեքսիկական տվյալ բանկի համար։
Մեղադրանքի բոլոր դրվագներով Կուելյար ամուսիններին սպառնում է երկար տարիների ազատազրկում։