Այս տարվա հունվարին միասնական քննություն հանձնած ավելի քան 8000 դիմորդներից 6000-ը դեռ չեն հայտագրվել dimord.am կայքում, չեն նշել թե որ բուհ են դիմում և ինչ մասնագիտությամբ։
Գնահատման ու թեստավորման կենտրոնում սկսել են անհանգստանալ և նամակ-հիշեցում են ուղարկում միասնական քննություն հանձնած դիմորդներին։
Գնահատման ու թեստավորման կենտրոնի փոխտնօրեն Կարո Նասիբյանը երեկ հրավիրված ասուլիսում նշել էր, որ անկախ այն հանգամանքից` դիմորդը գոհ է իր քննության արդյունքից, թե ոչ, պետք է հայտագրվի Dimord.am կայքում` ընտրի բուհ ու մասնագիտություն։
Հակառակ պարագայում, ըստ Նասիբյանի` մինչև մայիսի 10 չհայտագրվելու դեպքում դիմորդը կզրկվի այս տարի բուհ ընդունվելու հնարավորությունից։ ԳԹԿ-ում ակնկալում են, որ դիմորդների մեծ մասը գոհ կլինեն միասնական քննության արդյունքներից ու չեն մասնակցի հունիսին սպասվող միասնական քննության երկրորդ փուլին։
Կրթության փորձագետ Ատոմ Մխիթարյանը Sputnik Արմենիայի հետ զրույցում նշել է, որ չեն հայտագրվել այն դիմորդները, ովքեր ցածր գնահատականներ են ստացել։