ԵՐԵՎԱՆ, 2 մայիսի – Sputnik․ ՀՀ–ում կա ավելի քան 1300 ուսուցիչ, որոնք չունեն բարձրագույն կրթություն ու իրենց գործունեությունն արդեն դադարեցրել են 2023 թ. օգոստոսից։ Այս ուսուցիչները կարող են շարունակել իրենց աշխատանքը` կա՛մ ստանալով բարձրագույն կրթություն, կա՛մ անցնելով կամավոր ատեստավորում։ ՀՀ կառավարությունն այսօր որոշեց երկու դեմքում էլ ֆինանսական օժանդակություն ցուցաբերել։
ՀՀ կրթության, գիտության, մշակույթի և սպորտի նախարար Ժաննա Անդրեասյանը գործադիր մարմնի նիստում նշեց, որ բարձրագույն կրթություն չունեցող ուսուցիչների գործունեությունը պարբերաբար երկարաձգվել է, ու արդյունքում նրանք շուրջ 12 տարի տարի հնարավորություն են ունեցել լուծելու իրենց կրթության հարցը։
«Այնուամենայնիվ, 894 ուսուցիչ այս ընթացքում մասնակցել է կամավոր ատեստավորմանը և հիմա բարձրացված աշխատավարձ է ստանում։ Ավելի քան 150 ուսուցիչ այսօր ցանկանում է բարձրագույն կրթություն ստանալ, իսկ շուրջ 500 ուսուցիչ ցանկանում է մասնակցել կամավոր ատեստավորման։ Հենց այս երկու խմբին է ուղղված լինելու կառավարության օժանդակությունը»,– ասաց նա։
ՀՀ վարչապետ Նիկոլ Փաշինյանն իր հերթին նշեց, որ այսօր, երբ առնչվում ենք աղքատության երևույթի հետ, տեսնում ենք, որ, ի վերջո, կրթության որևէ օղակում այս մարդիկ չեն ստացել նորմալ կրթություն։
«Մեր երկրում ընկալում կա, որ ուսուցչի աշխատանքն այն է, որ էնքան որ տնից դուրս գան։ Բա էդ դեպքում երեխայի կրթության պատասխանատուն ո՞վ է։ Դրա համար էլ մեր երկրում կան ուսուցիչներ, որոնք ամսական 20-30 հազար դրամ աշխատավարձ են ստանում ու դրանով բավարարվում են»,– հայտարարեց վարչապետը։
Ըստ նրա` հիմա կառավարությունն առաջարկում է լրացնել կրթության այդ բացը։