ԵՐԵՎԱՆ, 1 մայիսի - Sputnik. Հայաստանի և Ադրբեջանի միջև սահմանների ճշգրտմանը վերաբերող փաստաթղթերը, որոնց ճակատագրի մասին բարձրաձայնել է «Պատիվ ունեմ» դաշինքից պատգամավոր Տիգրան Աբրահամյանը, փոխանցվել են պաշտպանության նախարարությանը, հայտնում է կադաստրի կոմիտեն:
Ավելի վաղ Աբրահամյանը խորհրդարանում ելույթի ժամանակ հայտարարել էր, որ 2022 թվականին կադաստրի կոմիտեում պահվել է 1988 թվականի փաստաթուղթ, որը տեղեկություններ էր պարունակում հայկական և Ադրբեջանական ԽՍՀ հողօգտագործողների սահմանների մասին։ Փաստաթղթին, ինչպես պնդում է պատգամավորը, կցվել է 182 քարտեզ, որոնք ընդգրկում են սահմանի 975 կմ հատվածը։ Սակայն 2024 թվականին կոմիտեում, ի պատասխան համապատասխան հարցմանը, հայտնել են, որ նման փաստաթուղթ իրենք չունեն։ Աբրահամյանը ենթադրել է, որ դրանք կարող էին կամ ոչնչացվել, կամ թաքցվել։
Կադաստրի կոմիտեն հաստատել է, որ 2022 թվականին նշված նյութերն իսկապես պահվել են իրենց մոտ։
«Դրանք եղել են «գաղտնի» մակագրությամբ, ուստի 2022 թվականին պատգամավոր Հայկ Մամիջանյանի հարցմանն ի պատասխան հայտնել ենք, որ նյութերը տրամադրման ենթակա չեն և դրանց կարելի է ծանոթանալ միայն տեղում ՝ պատշաճ կարգով դիմելու դեպքում»: Դրանից հետո կոմիտեն Մամիջանյանից հարցումներ չի ստացել», - ասված է հաղորդագրության մեջ։
Նշվում է նաև, որ 2023 թվականին փաստաթղթերը փոխանցվել են ՀՀ պաշտպանության նախարարությանը: Սակայն 2024 թվականին, երբ Տիգրան Աբրահամյանը դիմել է կադաստրի կոմիտե, նրան հայտնել են, որ փաստաթղթերն այլևս չկան, բայց առաջարկել են տեղում ծանոթանալ այլ նյութերի հետ։ Աբրահամյանն այդ առաջարկին չի արձագանքել, պնդում են գերատեսչությունում ։
Կոմիտեի հայտարարության մեջ նաև նշված է, որ ոչ մի արխիվային փաստաթուղթ չի ոչնչացվել։
Հիշեցնենք, որ ապրիլի 19-ին ՀՀ ԱԳՆ-ն պետական հանձնաժողովների 8-րդ հանդիպման արդյունքներով հայտնել էր, որ Հայաստանն ու Ադրբեջանը պայմանավորվել են սահմանազատումը սկսել Տավուշի մարզից և մինչև հուլիսի 1-ը ավարտել սահմանազատման հանձնաժողովների համատեղ գործունեության մասին դրույթի նախագծի համաձայնեցումը: Նույն օրը երեկոյան Տավուշի սահմանամերձ գյուղերի բնակիչները, դժգոհ լինելով Երևանի և Բաքվի պայմանավորվածություններից, բողոքի ակցիաներ են իրականացնում: