ԵՐԵՎԱՆ, 30 ապրիլի – Sputnik. Հատուկջոկատայինները պղպեղային սփրեյ են կիրառել «Օտարերկրյա ազդեցության թափանցիկության մասին» օրինագծի դեմ ընթացող բողոքի ակցիայի ժամանակ։ Տեղեկությունը հայտնում է Sputnik Գրուզիան։ Լրատվամիջոցի հաղորդմամբ՝ ոստիկանությունն այդ քայլին է դիմել, երբ ցուցարարները հրաժարվել են ենթարկվել ոստիկանության պահանջին՝ չփակել խորհրդարանի շենքի մուտքերը:
Ցուցարարները ուժայինների ուղղությամբ տարբեր առարկաներ են նետել, այդ թվում՝ պլաստիկ շշեր։ Այդ ժամանակ հատուկջոկատայինները ակցիայի մասնակիցներին հեռացրել են խորհրդարանի մուտքերի մոտից։ Տեղում նաև ջրցան մեքենա կա, սակայն այն դեռ չի կիրառվել։
Բողոքի ակցիայի ժամանակ իրավիճակը սրվել է,երբ ավարտվել է լիագումար նիստը, որտեղ ընթացել է սկանդալային օրինագծի քննարկումը։
ԶԼՄ-ների տվյալներով՝ մի քանի մարդ է բերման ենթարկվել։
Ավելի վաղ Վրաստանի խորհրդարանն առաջին ընթերցմամբ հավանություն էր տվել օտարերկրյա գործակալների մասին օրինագծին, որին դեմ են արտահայտվել Վրաստանի նախագահ Սալոմե Զուրաբիշվիլին, ընդդիմությունը և արևմտյան դիվանագետները. նրանք համարում են, որ այդ օրենքը կխանգարի Եվրամիությանն ինտեգրվելու հարցում։