ԵՐԵՎԱՆ, 26 ապրիլի – Sputnik. Սառեցված ակտիվների հնարավոր բռնագրավումը ոչ մի ազդեցություն չի ունենա Ռուսաստանի Դաշնության ֆինանսական կայունության վրա։ Այս հայտարարությունն արել է Ռուսաստանի կենտրոնական բանկի ղեկավար Էլվիրա Նաբիուլինան։ Նրա խոսքը մեջբերում է ՌԻԱ Նովոստին։
«Ինչ վերաբերում է ոսկու և արժույթի մեր պաշարների հնարավոր բռնագրավմանը, դա որևէ ազդեցություն չի ունենա մեր ֆինանսական կայունության վրա, քանի որ սառեցված ակտիվներով գործառնությունները տևական ժամանակ դադարեցված են, մենք դրանք չենք օգտագործում», - ասել է Նաբիուլինան՝ պատասխանելով հարցին, թե ինչպես է ԿԲ–ն գնահատում ԱՄՆ-ի կողմից ռուսական ակտիվների հնարավոր բռնագրավման մասին որոշման ազդեցությունը Ռուսաստանի ֆինանսական կայունության վրա։
Նա հավելել է, որ Ռուսաստանի Դաշնությունը երկար տարիներ դիվերսիֆիկացնում է ոսկու և արժույթի իր պահուստները, ուստի Ռուսաստանն ունի բավականաչափ հասանելի պահուստներ, որոնց վրա պատժամիջոցները չեն ազդում, և դրանք բավարար են ֆինանսական կայունությանը սպառնացող հնարավոր ռիսկերը նվազեցնելու համար: