ԵՐԵՎԱՆ, 23 ապրիլի – Sputnik. Հայաստանի Հանրապետությունն այնքան է, որքան իր զինվորը կարող է կանգնել։ Ոսկեպար-Կիրանց ճանապարհահատվածին լրագրողների հետ զրույցում այս մասին ասաց Տավուշի թեմի առաջնորդ Տեր Բագրատ արքեպիսկոպոս Գալստանյանը։
«Ինձ համար ՀՀ տարածքային ամբողջականությունը ո՛չ թվերով է, ո՛չ սահմաններով է, ո՛չ էլ․․․ Էս վերջին շրջանում են մարդիկ հիշել Ալմա Աթա, սովետական, ԽՍՀՄ, եսիմ ինչ, ՄԱԿ, լիքը բաներ են հիշել վերջին 1-2 տարում։ 1 տարի առաջ ՀՀ-ն 29,800 քառակուսի մետր էր ըստ ինչ-որ հանրագիտարանի, հիմա ՀՀ-ն 29,743 է, երևի ըստ մեկ այլ հանրագիտարանի, վաղը ի՞նչ է լինելու․․․»,- ասաց Սրբազանը։
Նա շեշտեց՝ երկրի վարչապետը պարտավոր է պատասխանատու լինել իր յուրաքանչյուր խոսքի համար։
Հիշեցնենք` Հայաստանի և Ադրբեջանի սահմանազատման հարցերով հանձնաժողովներն ապրիլի 19-ին պայմանավորվել են սահմանազատումը սկսել Տավուշի մարզից։ Սահմանագծի տվյալ հատվածների նկարագրությունը կազմվելու է` հաշվի առնելով տեղանքում գեոդեզիական չափումների արդյունքում կատարված կոորդինատների հստակեցումը, որը պետք է ավարտվի մինչև 2024 թ. մայիսի 15-ը:
ՀՀ վարչապետի աշխատակազմը հայտարարել է, որ Ադրբեջանն այս ամենի արդյունքում 2.5 գյուղ է ստանում, իսկ Հայաստանի Հանրապետությունը` անվտանգային ռիսկերի նվազեցում։ Կիրանց գյուղի հատվածում ճանապարհի մի քանի հարյուր մետրանոց հատվածի փոփոխություն կարվի, իսկ Ոսկեպարը ճանապարհի խնդիր չի ունենա։ Սահմանազատումից հետո չորս գյուղերի հատվածում զինված ուժերը հետ կքաշվեն և իրենց տեղը կզիջեն սահմանապահ զորքերին:
Տավուշի սահմանամերձ գյուղերի բնակիչներն ապրիլի 19-ից բողոքի ակցիաներ են անում Հայաստան-Վրաստան միջպետական ճանապարհին: Նրանք դեմ են սահմանազատման այն տարբերակին, որը համաձայնեցրել են Երևանն ու Բաքուն։