Ադրբեջանի կողմից անցած տարվա սեպտեմբերին Հակարիի անցակետում ապօրինաբար ձերբակալված ապա կալանավորված, Արցախի նախկին պետնախարար Ռուբեն Վարդանյանի ընտանիքը անցած շաբաթավերջին հայտարարել էր, որ ապրիլի 5-ից Վարդանյանը հացադուլ է անում՝ պահանջելով անհապաղ և անվերապահ ազատ արձակել իրեն և Բաքվում ապօրինաբար պահվող մյուս հայ բանտարկյալներին։
Հացադուլը սկսելուց հետո դադարեցվել են ընտանիքի հետ նրա հեռախոսազանգերը՝ բացահայտորեն խախտելով միջազգային իրավունքի բոլոր նորմերը։ Հունվարին սպասվող դատաքննությունն առանց պատճառի տեղափոխվել է մինչև մայիս, նշված է Վարդանյանի ընտանիքի հայտարարությունում:
Ապրիլի 21-ին տեղեկացանք, որ Ռուբեն Վարդանյանին թույլ են տվել կապ հաստատել ընտանիքի հետ։
Վարդանյանը հայտնել է, որ այս ամբողջ ընթացքում լրիվ մեկուսացած է եղել, անգամ կարդալու հնարավություն չի ունեցել: Ընտանիքի անդամների տեղեկություններով՝ բանտում միայն նրա ճնշումն են չափում։
Իրավապաշտպան Սիրանուշ Սահակյանը Sputnik Արմենիային հետ զրույցում կարծիք է հայտնել, որ ադրբեջանցիները քողարկել են Վարդանյանի կողմից հացադուլ անելու փաստը։
«ՀՀ-ն պետք է առնվազն հյուպատոսական գործառույթներ ապահովի Բաքվում ապօրինի պահվող իր քաղաքացիների հետ»,-նշում է իրավապաշտպանը։