ԵՐԵՎԱՆ, 20 ապրիլի – Sputnik. Հայաստան–Վրաստան միջպետական ճանապարհը փակած տավուշցիներին միացած 96-ամյա Լենա Ղարդաշյանը կմնա համագյուղացիների հետ այնքան, որքան պետք լինի։
Ավելի վաղ հայտնել էինք, որ տավուշցիները Երևանի ու Բաքվի երեկվա պայմանավորվածություններից հետո բողոքի են դուրս են եկել և մինչև առավոտյան 05։30 եղել են Հայաստան–Վրաստան միջպետական ճանապարհին։ Ակցիան վերսկսվել է այսօր առավոտյան։
Sputnik Արմենիայի հարցին, թե որքան է պատրաստվում մնալ իր համագյուղացիների հետ ու ճանապարհը փակ պահել, 96-ամյա կինը շեշտեց` որքան պետք լինի կմնա ու կպայքարի։
«Կարող ա` մինչև հաջորդ նիստը նստած լինեմ, կարող ա` հրաման տան, որ մեզ ըստեղից տանեն, ու գան, տանեն։ Ես իմ հողի համար եմ պայքարում, որ ինձ թողնեն։ Էնքան տարածք ենք տվել, որ հոգնել ենք, հերիք ա»,– ասաց Լենա տատիկը։
Նա նշեց, որ իր տունը սահմանազատման հետևանքով չի մնալու Ադրբեջանի հսկողության տակ, բայց իր երեխայի գերեզմանն է մնալու այդ հատվածում, հետևաբար համաձայն չէ, որ իր գյուղից որևէ թիզ հանձնվի։
Sputnik Արմենիայի մեկ այլ հարցի, թե ըստ իշխանության սահմանը կարող է բացվել, ադրբեջանցիների հետ առևտուր կանեն, տատիկը բարկացավ` թուրքի հետ առևտուր չի անի երբեք։
«Ինձ ո՛չ փոխհատուցում, ո՛չ փող ա պետք, ինձ իմ հողն ա պետք։ Սոված կկենամ, բոբիկ կկենամ, տկլոր կկենամ, բայց իմ հողում կմնամ, թուրքի հետ էլ հարևանություն չեմ անի։ Ասում են շան հետ ընկերություն արա, բայց փետը ձեռիցդ մի գցի»,– ասաց Լենա տատը։
Հիշեցնենք` Հայաստանի և Ադրբեջանի սահմանազատման հարցերով հանձնաժողովներն ապրիլի 19-ին պայմանավորվել են սահմանազատումը սկսել Տավուշի մարզից։ Սահմանագծի տվյալ հատվածների նկարագրությունը կազմվելու է` հաշվի առնելով տեղանքում գեոդեզիական չափումների արդյունքում կատարված կոորդինատների հստակեցումը, որը կձևակերպվի համապատասխան արձանագրություն-նկարագրությամբ, ինչը կողմերի միջև պետք է համաձայնեցվի ու ստորագրվի մինչև 2024 թ. մայիսի 15-ը:
ՀՀ վարչապետի աշխատակազմը հայտարարել է, որ Ադրբեջանն այս ամենի արդյունքում 2.5 գյուղ է ստանում, իսկ Հայաստանի Հանրապետությունը` սահմանազատման հետ կապված և անվտանգային ռիսկերի նվազեցում։ Կիրանց գյուղի հատվածում ճանապարհի մի քանի հարյուր մետրանոց հատվածի փոփոխություն կարվի, իսկ Ոսկեպարը ճանապարհի խնդիր չի ունենա։ Սահմանազատումից հետո չորս գյուղերի հատվածում զինված ուժերը հետ կքաշվեն և տեղը կզիջեն սահմանապահ զորքերին: