ԵՐԵՎԱՆ, 19 ապրիլի – Sputnik. Երևանի քաղաքապետարանի աշխատակիցներն այսօր ստուգայցեր են կատարում Երևանի փողոցներով` թույլ չտալով փողոցային առևտուրը։
Մաշտոցի պողոտայում գտնվող «Երևան Սիթի» սուպերմարկետի մայթին մանր առևտրով զբաղվողները փորձեցին ընդդիմանալ քաղաքապետարանի աշխատակիցներին` թույլ չտալով առգրավել իրենց ապրանքը։ Մի պահ նույնիսկ քաշքշուկ սկսվեց նրանց միջև։
Քաղաքապետարանի աշխատակիցների հարցին, թե ինչու իրենց ապրանքը շուկայում չեն վաճառում, վաճառականները պատասխանեցին` շուկաներ չկան, իրենք էլ ինչ–որ ձևով պետք է կարողանան ապրել։
«Այս մարդկանց 100 անգամ զգուշացվել է, որ չի թույլատրվում փողոցային առևտուրը։ Մինչդեռ նրանք կռիվ են սարքում։ Արձանագրություն ենք կազմում, բայց դա չի ազդում, քանի որ նրանք սնանկ են»,– լրագրողներին ասաց Երևանի քաղաքապետարանի հասարակական կարգի ծառայության պետ Արամ Գյուլզադյանը։
Նա վստահեցրեց, որ այս մարդկանց բազմիցս առաջարկվել է աշխատել քաղաքապետարանի տարբեր բաժիններում` կանաչապատում, աղբահանություն և այլն, որտեղ բավական բարձր աշխատավարձեր են` ավելի քան 200 հազար դրամ, բայց նրանք մերժել են։
Մանր առևտրով զբաղվողներին օգնության հասան անցորդները։
«Էս խեղճ մարդիկ ի՞նչ են անում, թող գնան, մյուս անօրինականությունները վերացնեն։ Ո՛չ աշխատանք կա, ո՛չ էլ այլ միջոց, բա ի՞նչ անեն էս մարդիկ»,– ասաց նրանցից մեկը։
Անցորդները վստահեցրին, որ փողոցային առևտրով զբաղվողներից նույն ապրանքն ավելի ցածր գնով են ձեռք բերում։
Նշենք, որ քաղաքապետարանի աշխատակիցներին ուղեկցում են ոստիկանները։