ԵՐԵՎԱՆ, 19 ապրիլի – Sputnik. Արգելվել է ռուսական «Տիմոշա» ՍՊԸ որոշ արտադրատեսակների ներմուծումը Հայաստան։ Տեղեկությունը հայտնում է ՀՀ սննդամթերքի անվտանգության տեսչական մարմինը։
Ավելի վաղ հայտնել էինք, որ ՀՀ սննդամթերքի տեսչական մարմնի տեսուչները «Մեգա Ֆուդ» ՍՊԸ-ում իրականացրած վերահսկողության ընթացքում նմուշառում էին կատարել «Տիմոշա» ՍՊԸ արտադրության 7 տեսակի հալվաներից և ներկայացվել լաբորատոր փորձաքննության: Հալվաներում հայտնաբերվել էր «Կադմիում», որը ցուցանիշով չէր համապատասխանել Մաքսային միության տեխնիկական կանոնակարգով սահմանված պահանջներին:
ՀՀ սննդամթերքի անվտանգության տեսչական մարմնի ղեկավարի հրամանով՝ սույն թվականի ապրիլի 22-ից արգելվել է Ռուսաստանի Դաշնության «Տիմոշա» ՍՊ ընկերության արտադրության որոշ խմբաքանակներ։
Ըստ հաղորդագրության` արգելվել է 2024 թվականի հունվարին արտադրված «Հալվա արևածաղկի չամիչով», «Կոզինախ արևածաղկի ֆրուկտոզայով», «Հալվա արևածաղկի գետնանուշով» և 2024 թվականի փետրվարին արտադրված «Հալվա արևածաղկի», «Հալվա արևածաղկի գետնանուշով», «Կոզինախ արևածաղկի», «Հալվա արևածաղկի օդային» արտադրատեսակների ներմուծումը Հայաստանի Հանրապետություն։
Ընդգծվում է, որ «Տիմոշա» ՍՊ ընկերության այլ արտադրատեսակների Հայաստանի Հանրապետություն ներմուծման ժամանակ կվերցվեն նմուշներ և ներկայացվեն լաբորատոր փորձաքննության «Կադմիում» ցուցանիշով։
Հիշեցնենք` տեսչական մարմնի կողմից տրվել է նշված արտադրանքների իրացումն արգելելու, շուկայից հետ կանչելու, ոչնչացնելու կամ օգտահանելու մասին կարգադրագիր։