Միջազգային մամուլը գրել էր, որ այսօր լուսադեմին Իսրայելը 3 հատ անօդաչու թռչող սարքերով գրոհել է Իրանի տարածքը։ Պայթյուններ են եղել Սպահանի օդանավակայանի և ռազմաօդային բազայի տարածքում։
Իրանի մի շարք նահանգներում հակաօդային պաշտպանության համակարգեր են գործարկվել։ Ըստ Իրանի կիբեռտարածության ազգային կենտրոնի ներկայացուցիչ Հոսեյն Դալիրիանի՝ Սպահանի երկնքում խոցված անօդաչուները, ամենայն հավանականությամբ, արձակվել են Իրանի տարածքից։ «Դրանց թռիչքի հեռահարությունը շատ կարճ է։ Հարձակումն անկասկած, ներսից է եղել»,-հստակեցրել է Դալիրիանը։
«ՄԱԳԱՏԷ-ն կարող է հաստատել, որ Իրանի միջուկային օբյեկտներին վնաս չի հասցվել։ Գործակալության գլխավոր տնօրեն Ռաֆայել Գրոսին շարունակում է զսպվածության կոչ անել բոլորին և կրկին հայտարարում է, որ միջուկային օբյեկտները երբեք չպետք է թիրախ դառնան ռազմական հակամարտություններում: ՄԱԳԱՏԷ-ն ուշադիր հետևում է իրավիճակին»,-նշված է Ատոմային էներգիայի միջազգային գործակալության X-ի միկրոբլոգում։
Օրերս էլ Իրանն էր 300-ից ավելի հրթիռներ և անօդաչու թռչող սարքեր արձակել Իսրայելի ուղղությամբ։ Ըստ իսրայելական կողմի՝ դրանց 99 տոկոսը ոչնչացվել էին։
Իրանագետ Ժաննա Վարդանյանը Sputnik Արմենիայի հետ զրույցում կարծիք է հայտնել, որ Իսրայելի ոչ շատ խիստ թեթև պատասխան հարվածը Իրանին վկայում է այն մասին, որ երկու կողմերն էլ հակված են լարվածության թուլացման։