ԵՐԵՎԱՆ, 17 ապրիլի – Sputnik. Բագրատաշենի մաքսային կետ–բաժնում ՀՀ պետական եկամուտների կոմիտեն հայտնաբերել է դեղորայքի անօրինական տեղափոխման նոր դեպք: Տեղեկությունը հայտնում է կոմիտեի մամուլի ծառայությունը։
Զննության արդյունքում պարզվել է, որ մաքսային կետ–բաժին ժամանած ՀՀ քաղաքացի Վ.Ա.–ի վարած մարդատար տրանսպորտային միջոցի վարորդի կողքի ուղևորի հատակը սովորականից բարձր է:
Նշվում է, որ հետագա հսկողություն իրականացնելու նպատակով մեքենան ուղեկցվել է խորը զննման անգար։ Տրանսպորտային միջոցի գորգի տակ հայտնաբերվել են թաքցված դեղամիջոցներ, թեև մաքսային հսկողության գոտում Վ.Ա.–ն մաքսային ծառայողին ասել է, որ մեքենայում հայտարարագրման ենթակա ապրանքներ չկան:
«Ավտոմեքենայի դռների պաստառների տակից, հետևի նստատեղի տակ հատուկ հարմարեցված թաքստոցից, բեռնախցիկի ձախ կողային պաստառի տակից հայտնաբերվել են մաքսային հսկողությունից թաքցված տարբեր տեսակի դեղամիջոցներ, ներարկիչներ և դեղերի դատարկ տուփեր` ցուցումների հետ միասին, որոնց ընդհանուր քաշը կազմել է 67 կգ»,– նշված է հաղորդագրության մեջ։
Փաստի առթիվ ՀՀ ՊԵԿ ԱՄՎ Բագրատաշենի մաքսային կետ-բաժնի մաքսային ծառայողների կողմից կազմվել է մաքսային կանոնների խախտման վերաբերյալ արձանագրություն։