Ապրիլի 15-ին հանրային տրանսպորտում միջադեպ էր տեղի ունեցել ՔՊ-ական պատգամավոր Հակոբ Ասլանյանի և ակտիվիստ Սամվել Վարդանյանի մասնակցությամբ, որն ուղեկցվել է փոխադարձ հայհոյանքներով։ Միջադեպի առնչությամբ հարուցվել է քրեական գործ, պատգամավորին վիրավորած երիտասարդը ձերբակալվել է:
Ապրիլի 16-ին Վարդանյանի փաստաբանները հանդես եկան մամուլի ասուլիսով, որտեղ հայտարարեցին, որ իրենց պաշտպանյալը Ձերբակալվածների պահման վայր տեղափոխվելու ճանապարհին դիմակավորված անձանց կողմից ենթարկվել է ծեծի և խոշտանգման։
Փաստաբան Ռուբեն Մելիքյանն այսօր առավոտից ԱԺ «Հայաստան» խմբակցության պատգամավորներ Մհեր Սահակյանի և Արման Ղազարյանի հետ եկել էին Ձերբակալվածների պահման վայր, որպեսզի իրենց ավտոմեքենայով ուղեկցեն Սամվել Վարդանյանին Երևանի քննչական վարչություն տեղափոխող մեքենան։
ՁՊՎ–ի բակում Ռուբեն Մելիքյանը լրագրողներին ասել է, ոստիկանները Սամվել Վարդանյանին խոշտանգելու որևէ մոտիվացիա չունեին, և որ տեղի ունեցած սահմռկեցուցիչ դեպքը կարելի է համարել «Քաղաքացիական պայմանագիր» կուսակցության պատվերը։