ԵՐԵՎԱՆ, 16 ապրիլի – Sputnik. ՀՀ մարդու իրավունքների պաշտպան Անահիտ Մանասյանը պատրաստվում է Սամվել Վարդանյանին ծեծի ենթարկելու դեպքի առնչությամբ գրություններ ուղարկել ՀՀ ներքին գործերի նախարարություն և գլխավոր դատախազություն։ Տեղեկությունը հայտնում է ՄԻՊ գրասենյակը։
Ապրիլի 15-ին համացանցում տեսագրություն տարածվեց, որում մի երիտասարդ անպարկեշտ արտահայտություններ է հնչեցնում պատգամավորի հասցեին, ինչից հետո հրմշտոց է սկսվում։ Ավելի ուշ պարզվեց, որ այդ երիտասարդը Սամվել Վարդանյանն է, որի նկատմամբ քրեական գործ է հարուցվել առերևույթ խուլիգանության հատկանիշներով։ Ապրիլի 16-ին փաստաբան Վարազդատ Հարությունյանը հայտնեց` Սամվել Վարդանյանին դաժան ծեծի են ենթարկել։ Ավելի ուշ հայտնի դարձավ, որ ՄԻՊ–ի ներկայացուցիչներն այցել են ոստիկանության Երևան քաղաքի վարչության ձերբակալվածներին պահելու վայր։
«Այցի շրջանակում պաշտպանի ներկայացուցիչներն առանձնազրույց են ունեցել Սամվել Վարդանյանի հետ, որի ընթացքում վերջինս ներկայացրել է դեպքին առնչվող մանրամասներ: Հաշվի առնելով լրատվամիջոցներում, սոցիալական ցանցերում տարածված հրապարակումները և առանձնազրույցի ընթացքում ներկայացված հանգամանքները՝ պաշտպանը սեփական նախաձեռնությամբ սկսել է քննարկման ընթացակարգ: Համապատասխան գրություններ կուղարկվեն ՀՀ գլխավոր դատախազություն և ՀՀ ՆԳՆ՝ նշված դեպքի հանգամանքները մանրամասն և բազմակողմանի քննության առարկա դարձնելու պահանջով»,–նշված է հաղորդագրության մեջ։
ՄԻՊ–ն ընդգծում է, որ բռնության ցանկացած դրսևորում խիստ անընդունելի է և պետք է արժանանա պատշաճ իրավական գնահատականի, իսկ մեղավորները` ենթարկվեն պատասխանատվության: Պաշտպանը կոչ է անում զերծ մնալ ատելություն, անհանդուրժողականություն կամ բռնություն քարոզող ցանկացած խոսքի կիրառումից և վարքագծից։