ԵՐԵՎԱՆ,15 ապրիլի – Sputnik. ՀՀ–ի և Ղազախստանի միջև դեռևս կա չիրացված ներուժ` զարգացնելու առևտրատնտեսական համագործակցությունը, խթանելու ներդրումները, զարգացնելու ենթակառուցվածքային կապերն ու առևտուրը։ Ղազախստանի նախագահ Կասիմ–Ժոմարտ Տոկաևի հետ համատեղ ճեպազրույցի ժամանակ այս հայտարարությունն արեց ՀՀ վարչապետ Նիկոլ Փաշինյանը։
«Տոկաևի պաշտոնական այցը կարևոր նշանակություն ունի հետագա` բազմոլորտ համագործակցության համար։ Հատկանշական է, որ այս այցը տեղի է ունենում մեր երկրների համար խորհրդանշական ժամանակահատվածում. այս տարի լրանում է ՀՀ և Ղազախստանի Հանրապետության միջև բարեկամության և համագործակցության մասին 25–ամյակը»,– ասաց նա։
Ըստ Փաշինյանի` երկու երկրների միջև երկխոսության բարձր մակարդակը ևս մեկ անգամ հաստատվեց քիչ առաջ ստորագրված համատեղ հայտարարությամբ, որն ուղենշային դեր ունի երկրների հետագա զարգացման և նոր ազդակներ հաղորդելու տեսանկյունից։
Նա նշեց նաև, որ քննարկվում է փոխադարձության սկզբունքով Աստանայում Հայ գրերի գյուտի հեղինակ սուրբ Մեսրոպ Մաշտոցի անվան պուրակի և Երևանում ղազախ բանաստեղծ, ղազախական գրականության հիմնադիր Աբայ Կունանբաևի անվան պուրակներ հիմնելու հարցը։
ՀՀ վարչապետը տեղեկացրեց նաև, որ Կասիմ–Ժոմարտ Տոկաևին է ներկայացրել Ադրբեջանի հետ ՀՀ բանակցությունների ընթացքը։
Հիշեցնենք` Տոկաևը պաշտոնական այցով է ժամանել Հայաստան։ «Զվարթնոց» օդանավակայանում նրան դիմավորել է ՀՀ փոխվարչապետ Մհեր Գրիգորյանը։