Տավուշի մարզի սահմանամերձ մի քանի գյուղերին հարող տարածքներն Ադրբեջանին վերադարձնելու՝ վարչապետ Նիկոլ Փաշինյանի հայտարարությունից հետո, քաղաքական ու հասարակական տարբեր շրջանակներ սկսեցին ավելի հաճախ այցելել Տավուշի սահմանապահ Ոսկեպար, Բաղանիս և Կիրանց գյուղեր՝ իրենց աջակցությունը հայտնելու և գոտեպնդելու այդ գյուղերի բնակիչներին։
Անցած շաբաթավերջին հերթական հավաքը Ոսկեպարում կազմակերպել էր «Տավուշը հանուն Հայրենիքի» քաղաքացիական նախաձեռնությունը։
Հավաքին մասնակցում էին քաղաքացիներ, մշակույթի գործիչներ, Ազգային ժողովի ընդդիմադիր պատգամավորներ, հայ առաքելական եկեղեցու Տավուշի թեմի առաջնորդ Գերաշնորհ Տեր Բագրատ արքեպիսկոպոս Գալստանյանը, թեմի այլ հոգևորականներ։
Տարբեր մասնագիտական ոլորտներ ներկայացնող մի խումբ քաղաքացիներ, «Ժողովրդավարական համախմբում» կուսակցության նախագահ Սուրեն Պետրոսյանի հետ ապրիլի 2-ին մեկնել են Ոսկեպար՝ գյուղի բնակիչների կողքին կանգնելու և մինչ օրս շարունակում են մնալ այնտեղ։
«Համախմբման գործընթացը պետք է մի փոքր արագացնել և ուժեղացնել»,-Sputnik Արմենիայի հետ զրոյցում ասել է «Ժողովրդավարական համախմբում» կուսակցության նախագահ Սուրեն Պետրոսյանը։